Asina a informa coordinador di e comite local na Aruba Laura Luces na Bon Dia Aruba ayera na unda el a señala cu e iniciativa aki ta bay tuma luga na mesun momento na diferente paisnan rond di mundo e mesun dia 1 di october.

“Nos ta invita henter comunidad di Aruba pa colabora cu e causa di un Venezuela liber,” Luces a expresa.

E idea di e caminata aki ta pa duna visibilidad na eleccion primario cu ta bay tuma luga na Venezuela e proximo 22 di october unda ta bay eligi un candidato opositor unico, di mesun manera cu e contribucion di e caminata por yuda economicamente e Comision Nacional na Venezuela ken ta encarga di realisa e eleccion aki sin e participacion di Conseho Nacional Electoral (CNE).

Luces a informa cu no ta un secreto cu na Venezuela te ainda e necesidad ta existi y costo di bida ta keda dificil na unda no tin gasolin den mayoria di estadonan, problema di awa y coriente y cu esaki nan ta sigur cu pa dia 22 di october e situacion ta bay bira mas dificil.

E participacion pa e caminata tin un costo di solamente 10 florin y di e cifra ey, cinco (5) dollar ta bay na e organisacion aki na Venezuela pa por yuda cu tur e logistica cu tin mester di dje, tambe nan ta bay duna coy bebe y frutanan na e participantenan.

E caminata ta bay tuma luga dia 1 di october e cual tambe ta uni na mas di 30 pais na nivel mundial cu na mesun momento ta bay participa den iniciativa aki.

E punto di salida ta bay ta Plaza Simon Bolivar di Oranjestad unda cu for di 4or di atardi e personanan interesa di participa tambe por yega pa cumpra algun T-shirtnan cu nan ta bay bende di 25 florin cada un, e caminata mes ta cuminsa 5or y ta bay yega na Waf di Crucero unda tin e logo ‘I Love Aruba’ y bay back Plaza Bolivar, ta aproximadamente 4.4 kilometer di recorido manera Luces a menciona.

Den e caso aki nan no ta bay cera caminda pa realisa e actividad aki, nan ta bay cana band’i caminda unda nan ta conta cu boluntarionan y polis tambe ta al tanto di esaki.

Di mesun manera Luces a trece dilanti cu Venezuela ta un pais diferente na esun di hopi aña pasa e cual a bira victima di un gobierno dictatorial cu lamentablemente, a forsa pa hopi Venezolano sali for di nan pais pa busca un miho calidad di bida na otro paisnan rond di mundo, “Venezuela tabata un pais generoso cu tabata ricibi hopi migrante y awor mester di empatia di otro nacionnan pa por sali di e situacion aki, nos ta eherciendo un derecho universal di expresa cu nos kier un miho pais y esaki ta un chens di haciel’e, tin cu duna danki na Dios cu Aruba no tin e mesun problema cu otro paisnan tin, cu ta un isla bendiciona.” Luces a expresa.

Pa esnan interesa di patrticipa den e caminata, inscripcion ta bay tuma luga na diasabra awor na Berloni na Noord y Dog Lover Aruba na Shaba, pa cualkier informacion tocante e actividad of eleccion primario por tuma contacto na e-mail: clprimariaaruba@gmail.com.