Rapport di Comite di Prevencion, Tortura y Trato Inhumano (CPT) di aña 2022 publica recientemente ta indica cu Instituto Coreccional di Aruba (KIA) ta den un estado deficiente, no ta adapta pa hende cu algun limitacion fisico y tampoco tin programanan di formacion profesional pa e detenidonan.

Na momento cu e comision a haci e bishita a informa cu KIA tin un capacidad pa 270 detenido y na e momentonan ey tabatin 252 detenido, incluyendo 16 hende muhe y cuatro menor di edad. Un tercio di e reclusonan tabata den prison preventivo.

Pa loke ta trata maltrato y uso di forsa, e delegacion no a ricibi denuncianan di maltrato fisico na e detenidonan di parti di e personal. Sinembargo, si a ricibi varios denuncia di comportacion agresivo, como tambe uso inhustifica y/of uso excesivo di forsa di parti di ekipo “IBT” (Interne Bijstandsteam of K9) cu algun biaha tabata reforsa pa agentenan di polis durante control di e celnan. Supuestamente tabata duna poco tempo na e presonan pa obedece e ordo y di biaha nan tabata utilisa e forsa contra esnan cu no tabata pone resistencia.

Ademas, e delegacion tambe a ricibi denuncia di insulto verbal na e detenidonan di parti di e personal penitenciario.

CPT a recomenda na autoridadnan pa transmiti un mensahe precies na ekipo di intervencion special, como tambe na agentenan di polis cu ta interveni den prison, cu solamente por haci uso di forsa ora ta estrictamente necesario y proporcional ora ta trata cu e detenidonan. E comite a recomenda cu intervencionnan di ekiponan aki mester ta supervisa pa directivanan halto.

Ademas, mester transmiti un mensahe claro na e personal penitenciario cu abuso verbal na e detenidonan ta inaceptabel y tin su consecuencianan.

A informa e delegacion cu no tabata existi un registro dedica na uso di forsa di parti di e personal. Algun informacion di uso di forsa nan por a hay’e den filenan disciplinario individual, por ehemplo, ora tabata haci procedemento disciplinario contra un detenido ora e no kier a cumpli un ordo. Sinembargo, e filenan cu e delegacion por a mira tabata cortico y tabata falta di precision.

CPT ta considera cu den cada caso di uso di forsa of medionan special, mester ta den un registro dedica na e proposito aki. Mester inclui e ora cu a cuminsa y a culmina e uso di forsa, circunstancianan di e caso, motibonan pa haci uso di forsa, tipo di medionan utilisa y un rapport di e lesionnan sufri tanto pa e detenido como pa e personal.

Tambe nan a recomenda na autoridadnan di Aruba pa tuma medidanan pa garantisa cu ta implementa e principionan aki ma efectivamente den practica di KIA.

CPT ta reconoce e esfuersonan realisa pa e personal pa preveni violencia entre e detenidonan, como identificacion si nan ta compatibel na momento cu nan ta drenta y durante nan tempo den prison, su asignacion posterior na unidadnan sigur, como tambe e limitacion di interaccion entre detenidonan di diferente unidad.

Aunke no tabatin un registro specifico di casonan di violencia entre e detenidonan, examen di registro disciplinario, como tambe informacion colecta a traves di entrevistanan cu personal y e detenidonan, ta indica cu e situacion a mehora for di e ultimo bishita cu CPT a haci na 2014 y e casonan grave di violencia entre e detenidonan ta poco. Sinembargo, entre e filenan disciplinario nan a mustra cu te ainda regularmente ta produci casonan di violencia menos grave.

Condicionnan di detencion den e caso di e detenidonan hende homber

CPT a señala cu nan ta reconoce esfuersonan cu a realisa pa mehora e condicionnan material di e institucion, por ehemplo e mayoria di dak cu a drecha, a reemplasa algun man di porta, a renoba muraya den prizon y tabata construyendo un sala nobo pa laba paña na momento di e bishita.

A pesar di esfuersonan aki, nan a identifica varios deficiencia den pasado cu ainda tabata persisti. En general e condicionnan material ta keda deficiente. Mayoria di parti di e prison ta deteriora, vloer daña, gips y concret tabata cay di e dak y murayanan y e baranan di hero den structura di concret tabata na simpel bista y frustia.

Mayoria di e celnan cu ta midi aproximadamente 9.5 meter cuadra, excluyendo e instalacion sanitario, tabatin tres preso aden y tabata ofrece condicionnan hopi reduci. Ademas e celnan no tabatin un bel pa yama y e mayoria cu e delegacion a wak, tabata sushi y iluminacion tabata deficiente.

E delegacion a mira plas di awa stanca den varios parti di e prison, incluyendo e pationan pa haci ehercicio den aire liber, igual cu den areanan di actividad den e parti paden.

CPT ta reitera na autoridadnan pa tuma medidanan necesario pa mehora e areanan cu ta deteriora, ademas e cantidad di detenido den e mesun cel no mester ta mas cu dos.

E situacion di un detenido usuario di rolstoel ta motibo di preocupacion pa e delegacion. E prison no ta adapta pa e necesidadnan specifico di e persona aki y e detenido tabata depende di e boluntad di otro detenidonan pa e por haci su bida, ya cu e mester cumpli cu citanan medico, bishita, yamada telefonico y su tempo den aire liber. Ainda mas preocupante ta e instalacionnan sanitario den e celnan cu no ta adapta, y e persona aki mester di ayudo di otro hende cada biaha cu e mester haci uso di e WC of e kier a baña. CPT ta considera cu e situacion no tabata permiti un bida digno den institucion y por constitui un trato degradante.

CPT ta considera cu e detenido aki, como tambe otro detenidonan cu limitacion fisico, por haya miho condicionnan den futuro y si no por crea un area digno den KIA pa nan, e detenido mester bay na otro establecimento adecua na su necesidadnan.

E delegacion durante e entrevistanan a haya diferente denuncia tocante e calidad di cuminda cu tur detenido en general ta haya. Pa loke ta trata e regimen como regla en general, celnan tabata permanece habri pa por lo menos 6 ora pa dia y detenidonan por relaciona cu otro den nan unidad respectivo y sala comun. Tambe nan tabata haya acceso na pationan di ehercicio den aire liber durante un ora y mey dos biaha pa dia.

Mayoria di e detenidonan tabatin un trabao cu pago, pero tabata limita na poco ora pa dia, solamente 25 persona tabatin un trabao full-time of den un tayer. E unico oportunidad di formacion profesional cu tabata tuma luga na momento di e bishita tabata un curso di lassen cu un fundacion externo tabata duna.

E hecho ta cu mayoria di e detenidonan tabata pasa e mayor parti di nan dia sin haci nada, y oferta di actividadnan tabata totalmente insuficiente, tabata genera un frustracion considerabel entre e detenidonan.

Situacion di detencion den caso di hobennan deteni

Unidad Hubenil ta componi pa 12 cel (cada un cu 12 metro cuadra) y na momento di e bishita tabatin cuatro hoben y 13 adulto hoben. E condicionnan material, segun CPT ta indica, ta deficiente manera esun menciona anteriormente den areanan general.

E programa di actividadnan pa hoben ta practicamente inexistente. Tabata ofrece les di yoga, acceso na un gym y algun deporte ocasional organisa, igual cu trabaonan facil, manera haci limpi.

E falta di actividad ta perhudicial pa e detenidonan, specialmente pa e hobennan, ken tin un necesidad particular di actividad fisico y stimulacion intelectual. Independientemente di nan periodo di detencion, CPT ta enfatisa cu mester di un programa completo di educacion, deporte, formacion vocacional, recreacion y otro actividadnan cu proposito.

Pa finalisa e parti, aki CPT ta considera cu e hobennan den prison no mester ta deteni den institucion pa adulto, como un regla en general, sino den centronan di detencion specificamente diseña pa personanan di edadnan aki, cu ta ofrece un ambiente no similar na esun di un prizon, cu regimennan adapta na nan necesidadnan y personal capacita den trato cu hobennan.

Bon Dia Aruba lo sigui amplia e rapport aki den e siguiente edicion.