For di par di dia caba, Bon Dia Aruba a bin informando tocante e Rapport di Comite di Prevencion, Tortura y Trato Inhumano (CPT) di aña 2022 publica recientemente unda ta indica cu Korrectie Instituut Aruba (KIA) tin scarsedad di personal, loke ta afecta e funcionamento adecua di e establecimento aki.

Den articulo aki, ta bay papia tocante personal di e prison y otro puntonan, na unda CPT ta indica cu for di nan ultimo bishita na 2014 e situacion di e personal ta sigui insuficiente pa e funcionamento adecua di e establecimento aki.

Di 147 personal di custodia, 72 di nan su funcion ta vacante y ocho di 75 oficial emplea tabata A.O pa largo plaso of tabata asigna pa otro tareanan. Pa henter e establecimento, e turno di dia mester a consisti di 29 oficial; sinembargo, hasta 10 di nan tabata miembro di personal recien contrata cu te ainda tabata den periodo di formacion inicial y nan mester a traha bao e supervision di coleganan cu mas experiencia. E turno di anochi tabata componi pa 12 oficial.

Un biaha mas a informa na delegacion cu A.O frecuente di e personal, como tambe algun caso di ausencia a largo plaso (hasta 10 aña) tabata sigui como un desafio importante.

Debi na esaki, no ta sorprende na nan cu e rol di e personal di custodia ta sigui limita pa keda solamente como “turn-key”, sin otro responsabilidadnan. CPT ta considera cu mester motiva e oficialnan di prison pa amplia nan rol pa interactua di manera positivo cu e detenidonan, participa den programanan di rehabilitacion y ta un elemento integral den un enfoke multidisciplinario pa e bienestar di e detenidonan. Esaki no solamente lo proporciona un trabao hopi mas desafiante y interesante pa oficialnan di prison, sino cu tambe lo aborda e aspecto di resocialisacion di e prison cu ta awor ta den un estado stanca.

CPT ta reitera su recomendacion na autoridadnan di Aruba pa tuma e medidanan necesario pa aumenta e cantidad di oficial di prison y desaroya e capacidad y e rol di nan, ademas mester aborda e nivel y e causanan di A.O di oficialnan.

E situacion ta igualmente problematico pa cu personal specialisa pa haci actividad y duna apoyo na e prisoneronan. Na e momento di e bishita, tabatin 2 trahado social, un instructor di formacion profesional, cuatro instructor di tayer y dos lider di actividadnan. E funcion di maestronan, asesor/coordinador di educacion y trabao, mas tres funcion di instructor di formacion profesional, instructor di beyesa, un funcion di trahado social y un di lider di actividadnan, tur di nan tabata bashi.

Cuestionnan relaciona cu siguridad

Den contexto di e buskeda di e celnan, na unda ora ta drenta na KIA den mayoria di e casonan ta realisa registro y e persona ta keda sunu, ta pidi na tur prisonero pa nan kita tur su paña y haci ‘squats.’

Aunke e detenidonan ta ser hiba cada un na su celnan bashi pa haci control ora nan ta sunu, a scucha denuncianan cu den algun reciente ocasion, tur persona di un unidad a keda sunu y a ordena na nan pa permanece asina mientras control tabata tuma luga na nan cel.

CPT ta considera cu den contexto di un evaluacion individual di riesgo, na unda nan mester keda sunu, semper mester tuma luga di manera cu ta respeta nan dignidad humano. Nunca mester exigi na e detenidonan pa nan kita nan paña y/of keda sunu dilanti otro detenidonan.

CPT ta expresa un preocupacion grandi pa e informacion proporciona tocante e registronan y exploracion di e partinan priva di e detenidonan hende muhe na juli di 2018, e registronan aki a ser ordena pa direccion di prison basa den sospecho di obhetonan ilicito den establecimento. A utilisa forsa di parti di miembronan di ekipo di intervencion special pa hiba e muhenan aki na sala di registro, durante lo cual un di nan presuntamente a bira victima di violencia fisico. Miembronan masculino di intervencion special tabata presente den e sala durante e registro y na final, nan no a haya obhetonan ilicito.

CPT ta kere firmemente cu somete e poblacion carcelario femenino na e procedementonan aki specialmente manera a describi anteriormente, por constitui un trato inhumano y degradante loke ta plantia preocupacion serio den materia di derechonan humano.

E delegacion ta recomenda cu tur tipo di registro asina aki tin cu realisa di manera cu lo respeta e dignidad y e derechonan di personanan involucra, sigurando cu ni un detenido lo keda someti na procedementonan innecesario of degradante.

Nan di opinion cu e buskeda y registro den partinan intimo di e detenido y otro partinan di e curpa ta implica un riesgo halto di abuso y intimidacion, mester desaroya metodonan alternativo di deteccion, como uso di test di ultrasonido. Un examen intimo interno mester tuma luga door di un dokter, cu no mester ta e mesun dokter cu ta trata nan den cuestion di salud pa asina preserva e relacion di dokter-pashent, ademas cualkier otro buskeda cu ta implica cu e detenido mester keda sunu mester tuma luga apart di e bista di e personal di custodia/siguridad di e sexo opuesto.

Ta inapropia cu miembronan di ekipo di intervencion special haci uso di armanan di candela den areanan di detencion durante e control di celnan. Comite mester enfatisa cu porte di arma di candela di parti di e personal cu ta den contacto direct cu detenidonan ta un practica indeseabel y peligroso, cu por duna luga na situacion di riesgo halto tanto pa e detenidonan como pa e personal.

CPT a keda impresiona di e enfoke basa den siguridad na KIA, na unda e direccion halto ta duna hopi importancia na inversionnan di siguridad como e murayanan cu fragmento di glas ariba nan, miembronan di ekipo special cu ta interveni den prison cu ekipo anti-disturbio completo cu uniforme di combati preto, cara tapa, escudo, armanan di candela den areanan di detencion y nan a ricibi varios denuncia tocante nan comportamento violento y uso inapropia di e forsa.

Tocante disciplina, e procedemento disciplinario ta bon documenta y den filenan di e detenidonan cu ta enfrenta cargo disciplinario prome nan ta scucha e persona antes di impone un castigo discilpinario y nan ta ricibi un copia di e decision.

Sancion di mas grave cu por impone ta aislamento solitario pa un maximo di 14 dia, sinembargo, den examen di filenan disciplinario e delegacion a haya cu e mesun sancion aki tabata imponi frecuentemente pa infraccion menor y tambe pa delitonan grave, como agresion na otro detenido. Ademas e aislamento tabata acompaña di e prohibicion di ricibi bishita. CPT ta recomenda na autoridadnan pa tuma medidanan pa garantisa cu e castigo disciplinario no lo inclui un prohibicion total di contacto familiar, cualkier restriccion di contacto familiar como forma di castigo por usa unicamente ora e delito ta relaciona cu e famia mes.

Detenidonan den aislamento ta ricibi bishita di personal di salud unicamente un biaha cada dos of tres dia, manera rapport di 2014 a señala, e servicio di salud di un prison mester duna atencion na e situacion di e detenidonan cu ta den aislamento solitario, mester bishita nan por lo un bes pa dia y duna nan asistencia medico y tratamento oportuno si ta necesario.

CPT ta di opinion cu prisoneronan cu tendencia suicida of cu den caso cu nan por haci daño na nan mes, no mester bay den celnan di aislamento, al contrario nan mester ta den contacto cu otro personanan.

Contacto cu exterior

E areglonan pa detenidonan por tene contacto cu exterior tabata satisfactorio na comienso, tanto prisonero den prison preventivo como esnan condena, por ricibi bishita durante un ora y 15 minuut cada siman y nan por haci yamada telefonico varios biaha pa dia.

Pero e uso continuo di un glas den e mesanan durante e bishitanan cu a introduci durante pandemia a genera un frustracion considerabel entre e detenidonan y e delegacion a ricibi varios keha pa cu esaki, nan ta recomenda na autoridadnan di Aruba pa tuma e medidanan necesario y kita e glasnan aki pa reintroduci e bishitanan sin restriccion.