(AP) — Un panel di NCAA ta haciendo un yamado pa retira marihuana for di e lista di e organisacion di droga prohibi, sugeriendo cu mester limita e test na substancianan cu ta mehora prestacion.
E propuesta revela ayera for di e Comite riba Salvaguardia Competitivo y Aspectonan Medico di Deporte lo marca un cambio grandi pa NCAA, cu ta conduciendo test di droga na campeonato y evento desde 1986. Miembronan di e comite a recomenda pa stop test di cannabis na eventonan asina te cu tuma un decision final, probablemente herfst aki.
Ainda lo mester introduci legislacion y tur tres division di NCAA lo mester aproba esaki pa e drenta na vigor. Administradornan den Divisionnan II y III a pidi e comite pa studia e asunto.
E recomendacion ta yega mientras Merca ta mirando mas y mas estado permitiendo uso medico of recreacional di marihuana.
Anteriormente e aña aki, e comite a aumenta e nivel di THC necesario pa un test positivo y a recomenda pa cambia castigo pa atleta. E nivel di THC – e ingrediente psicoactivo den marihuana – a ser aumenta di 35 pa 150 nanogram pa mililiter, igualando esun di Agencia Mundial Anti-Doping.
E comite a nota december ultimo cu marihuana y su productonan no ta considera como substancia cu ta mehora prestacion. Na luga di enfoca riba castigo pa uso di marihuana, e panel a sugeri pa reforsa politicanan cu ta enfoca riba potencial menasa di uso di marihuana y e necesidad pa reduci e daño y uso di productonan di marihuana.
