(AP) – E comite di etica di cuerpo gobernante di Formula Uni a declara Mohammed Ben Sulayem inocente den un par di keho di whistleblower cu a alega cu e presidente di FIA a interferi dos biaha den e competencia aña pasa.
FIA anteriormente e luna aki a bisa cu su oficial di cumplimento a ricibi dos keho contra Ben Sulayem. E prome a alega cu el a interveni pa anula un castigo duna na Fernando Alonso den e Grand Prix Saudi Arabia aña pasa. E segundo rapport di e mesun whistleblower tambe a bisa cu Ben Sulayem a bisa oficialnan pa no certifica e circuito di Las Vegas pa su careda di perfil halto november ultimo.
“Despues di revisa e resultado di e investigacion, e Comite di Etica tabata unanime den nan determinacion cu no tabatin evidencia di acusacionnan substantivo di interferencia di ningun tipo involucrando presidente di FIA, Mohammed Ben Sulayem,” e comite a bisa den su veredicto ayera.
E comite di etica, cu ta opera independiente for di FIA, a bisa cu a realisa un revision amplio cu a dura 30 dia y a entrevista 11 testigo.
“Acusacionnan contra presidente di FIA no tabatin base y a presenta evidencia fuerte sin duda rasonable pa sostene e determinacion di e Comite di Etica di FIA,” segun e declaracion. “E cooperacion completo, transparencia y cumplimento di e presidente a traves di e proceso durante e investigacion aki ta altamente aprecia.”
E comite di etica tambe a revisa un keho di un empleado di Red Bull cu a acusa e director di e team, Christian Horner di mal conducta. A declara Horner inocente pa compania mama di Red Bull, y a suspende e empleado.
E empleado a apela e veredicto di Red Bull na fabor di Horner y siman pasa a entrega un keho formal cu cuerpo gobernante di FIA. E drama rond di Red Bull y Horner ta sigui F1 den e Grand Prix Australiano e weekend aki, e di tres careda di e temporada.
