Diaranson ultimo minister Otmar Oduber (POR) encarga cu Medio Ambiente a reuni cu miembronan di Stichting Parkietenbos. Unda el a informa cu a lanta un comision cu mester bin cu solucion pronto pa e dump y desperdicio na Aruba.
E fundacion ta representa e habitantenan den bisindario cu e meta pa e dump Parkietenbos wordo cera.
Segun un relato di parti di minister, miembronan den e reunion a expresa di a ‘keda satisfecho cu e reunion cu minister Oduber’, den e sentido cu a instala un comision comienso di siman, y cu lo tin transparencia y accion’. Stichting Parkietenbos tambe ta forma parti di e comision, pa di e forma aki contribui hunto cu tur otro stakeholder nan pa soluciona e problema di maneho di desperdicio aki na Aruba.
Segun Aldrich Croes di Stichting Parkietenbos Aruba, e dump ya ta na un haltura cu no ta permiti y e dump ta viola tratadonan internacional na e punto cu e ta un menasa pa salud publico. ‘Ora cu biento cay, locual cu e bario aki ta pasa aden ta hopi lamentabel y algo cu bo no por imagina, pa cual tin cantidad di hende cu ya ta malo caba a consecuencia di e gas cu ta sali for di e haltura/tamaño di e dump di Parkietenbos’, sr. Croes a splica den e relato.
No ta tur di e miembronan di e fundacion tabata presente den e reunion. Ta tendiendo cu tur hende lo wordo envolvi, lo tin transparencia y accion pa a termino corto yega na solucion y pa termino largo tambe, segun e minister.
