(AP) — Hefe di politica digital di Union Europeo a adverti hefe di TikTok ayera cu e app di rednan social mester cumpli cu reglanan nobo pa plataformanan online cu ta bay bin na vigor e aña aki.
Comisionado di UE, Thierry Breton a tene un video yamada cu Shou Zi Chew, CEO di TikTok, e app popular Chines pa comparti video cu ta bao scrutinio cada bes mas pisa for di autoridadnan occidental pa motibo di preocupacion pa privacidad di data, seguridad cibernetico y malinformacion.
Nan a discuti e plannan di e compania pa cumpli cu e Ley di Servicio Digital di e bloc, cual ta programa pa bin na vigor pa e companianan online di mas grandi na september. E ley ta un set di reglanan amplio cu ta bay rekeri pa plataformanan reduci contenido dañino online y combati riesgonan online. “Cu audiencianan mas jong ta bin un responsabilidad mas grandi”, Breton a bisa, segun un transcripcion di e yamada. “No ta aceptable cu tras di caracteristicanan cu ta mustra dibertido y safe, ta tuma usuarionan algun seconde pa haya acceso na contenido dañino y cu tin biaha ta pone bida na peliger.”
Breton a añadi cu, cu miyones di usuarionan jong na Europa, TikTok tin un “responsabilidad special” pa sigura cu e contenido ta safe.
TikTok ta hopi popular entre hendenan jong, pero e hecho cu e ta Chines a genera miedo cu Beijing por us’e pa spiona riba data di usuario of pusha narativanan pro-China of malinformacion. TikTok ta propiedad di ByteDance, un compania Chines cu a move su sede na Singapore na 2020.
Breton a bisa cu e tambe ta preocupa pa acusacionnan cu TikTok ta spiona riba periodistanan y transferi cantidad di data personal di usuarionan pafo di Europa, den violacion di e reglanan estricto di privacidad di e bloc di 27 pais.
