Carta Abierta na Pueblo di Aruba
Ultimo Eleccion
Durante ultimo eleccion na 2013 pueblo di Aruba a haya oportunidad pa vota pa un partido cu tabata promove matrimonio di mesun sexo. E partido aki a keda rechasa categoricamente pa pueblo. Banda di e partido aki tabatin solamente un candidato riba un otro lista politico cu tambe tabata promove matrimonio di mesun sexo. E politico aki a drenta Parlamento no a base di voto preferencial sino a base di voto di personanan cu no a promove matrimonio di mesun sexo.
Democracia Representativo
Comision di Pastornan di Iglesianan Cristian di Aruba kier a recorda Parlamento y pueblo di Aruba cu miembronan di Parlamento ta representa e interes di pueblo di Aruba. Si e pueblo votado di Aruba no a vota masalmente pa esnan cu tabata promove matrimonio di mesun sexo, anto pueblo su representante den Parlamento no tin e autoridad moral pa trece e punto aki riba agenda.
Derecho Humano
No tin ningun prueba cientifico cu hende ta nace homosexual. Tene relacion cu persona di mesun sexo ta un escogencia, mescos cu un homber casa cu ta tene relacion cu mas cu un muhe ta haci un escogencia. Matrimonio di mesun sexo no ta un asunto di derecho humano, e ta un asunto di moralidad. Corte Europeo di Derecho Humano na juni 2016 a bolbe dicta cu matrimonio di mesun sexo no ta un derecho humano. Esnan na Aruba cu ta uza e argumento di derecho humano pa legalisa matrimonio di mesun sexo ta uzando manipulacion pa gana simpatia di pueblo. Pa Corte Europeo di Derecho Humano matrimonio ta entre un homber y un muhe. Mas cu tur cos, Palabra di Dios ta bisa cu matrimonio ta entre un homber y un muhe.
Codigo Civil Nobo
Ta bon pa pueblo di Aruba sa cu Parlamento ta bay trata nos Codigo Civil nobo. Leynan di matrimonio y famia ta parti di esaki. Cu un amienda chikito Parlamento por inclui parehanan di e mesun sexo den e ley aki. Si Parlamento bay di acuerdo cu e amienda aki esey kiermen cu matrimonio di mesun ta bira legal na Aruba. Si Parlamento vota na fabor di cualkier forma habri of scondi pa aproba matrimonio di mesun sexo nos Parlamento lo haci un deshonor grandi na e pueblo cu e ta representa y na Dios kende a institui autoridad di un pais.
Boluntad di Dios
Dios ta bisa cu husticia ta halsa un nacion ma pica ta un berguensa pa cualkier nacion. Un nacion cu kier legalisa algo cu ta contra e boluntad di Dios por spera e consecuencia di su desobediencia. No ta husto pa un cantidad chikito di miembro di Parlamento trece calamidad riba henter un nacion pa motibo di nan escogencia robes. Nos representantenan den Gobierno y den Parlamento tin un responsabilidad hopi grandi enfrente di Dios. Nos ta termina cu un promesa cu Dios a duna na Su pueblo pa medio di Su sirbido Moises: “Awor lo sosode cu si bo obedece cu tur diligencia SEÑOR bo Dios, y percura di cumpli cu tur Su mandamentonan cu mi ta ordena bo awe, SEÑOR bo Dios lo halsa bo riba tur e nacionnan di mundo.” Deutoronomio 28:1
Comision di Pastornan di Iglesianan Cristian di Aruba
