ORANJESTAD – Minister di husticia, Andin Bikker a declara cu dificilmente e por reacciona riba kehonan cu ta wordo expresa den media for di e migrantenan cu ta forma parti di nos mercado laboral, contra e mal tratonan verbal y te hasta fisico cu nan ta bin hayando, durante accion di control realisa pa nos autoridadnan competente. E ta haya cu ta dificil pa e emiti un opinion si no tin un caso specifico pa e por referi na dje.
Bikker a señala cu aworaki nan ta bezig ta instalando un comision a base di e ley nobo di admision y expulsion di migrantenan, of LTU, cu a drenta na vigor for di prome di december ultimo. E comision aki su tarea lo ta tambe pa atende cu tipo di remarca of keho asina. Nan lo check kico ta pasando, pero den caso specifico y debidamente formula.
Sinembargo, e mandatario ta haya cu nos mester tene cuenta cu aworaki nos pais ta den un situacion sin precedente, debi na e situacion cu ta bibando e pais bisiña di Venezuela. Tabatin casi 1,800 deportacion cu a tuma luga aña pasa, den comparacion cu 800 cu a tuma luga na 2017. E cifra di deportacion a bay mas cu redobla, y esey e mandatario ta haya cu ta pone hopi presion riba e personal di e departamento di inmigracion y Warda Nos Costa.
