Diamars mainta, Comision Integral Nacional di Genero di Aruba a tene su di tres tayer, e biaha aki riba Hende Muhe y Educacion na edificio moderno MFA-Noord. E comision aki a wordo institui pa Minister di Enseñansa y Maneho di Famia, sra.Michelle Hooyboer-Winklaar pa bin cu un maneho integral di genero pa Aruba.
Pa e comision diseña un maneho, nan a bin cu un serie di tayer y grupo di trabou pa nan consulta cu tur e partnernan gubernamental y no gubernamental y personanan cu ta trahando directo of indirectamente cu hende muhe riba diferente tereno,ya sea di labor, enseñansa, salubridad, violencia contra hende muhe, etc…
Den tur e tayernan cu nan a realisa e invitadonan ta mixto di ambos sector. Tin biaha e comision tambe ta invita specialistanan riba diferente tereno rond di hende muhe. Den e tayer di diamars ultimo nan tabatin como invitado expertonan di departamento di Enseñansa y Inspeccion di Enseñansa, pero tambe tabatin fundacionnan entre nan WGK, Telefon Pa Hubentud (TpH), diferente fundacion di scol, etc… Di e forma aki nan por haya informacion valioso pa traha e plan integral riba genero na Aruba.
Tayernan
CEDEHM cu ta atende cu desaroyo di hende muhe y famia ta esun cu ta guia e comision aki bou presidencia di e hurista, sra. Maria van der Biezen. El a splica cu nan tabatin dos tayer prome. E prome tayer a trata e topico “Hende muhe, entrada y trabou” y e di dos tabata riba “Hende muhe y violencia”.
Nan lo tin cu evalua cual lo ta e perspectiva nobo cu nos tin cu wak y atende cu e asuntonan aki. “Pa bin cu un maneho mas structura ora cu ta trata di violencia y con pa preveni den famia”, el a bisa. E siguiente tayernan tin di haber cu “Hende muhe y su salud”; e di cinco tayer ta “Hende Muhe y Pobresa” y e delaster tayer ta “Stimulacion di hende muhe pa sigui crece den posicionnan clave”.
Plan integral
Unabes cu nan ta bin cla cu e seis tayernan nan lo compila tur informacion cu a wordo produci, y nan ta bay hink’e den un plan cu nan lo entrega na minister Hooyboer-Winklaar. Asina aki e mandatario por haya un panorama global riba kico gobierno lo mester pone mas atencion ariba si ta existi desigualdad bou generonan.
Ta na gobierno pa dicidi con pa implementa e recomendacionnan cu e comision aki a bin cun’e. Tambe e forma con gobierno ta bay implemente ta otro tarea cu tin cu bini den e proceso pa bin cu un plan integral riba maneho di genero.
Riba nan agenda e comision tin plania pa realisa e ultimo tres tayernan prome cu fin di juli venidero. Despues nan lo tin tres luna di hopi trabou den seno di e comision mes pa entrega e plan aki tentativamente pa fin di october y/of cuminsamento di november. Sra. van der Biezen tin tur confiansa cu pa e fechanan aki nan lo por tin e concepto di e plan menciona pa entrega na e mandatario.
“E ta un tarea cu nos a haya di minister (sra. Hooyboer-Winklaar). Logicamente e tin cu bay na minister pa e acorda eseyprome cu e ta wordo trata of publica”, asina e presidente di e comision a bisa.
E comision aki tin representantenan di departamentonan gubernamental di diferente ministerio. Tambe ta forma parti di e comision aki sra. Monique Plasa di CBS; sra. Minouche Lopez di Departamento di Salubridad, sra. Celia Thiel di Departamento di Asunto Social; sra. Gwennan Boekhoudt di Departamento di Enseñansa, sra. Olivia Croes di Departamento di Relacion Exterior; Judela Briceño di Departamento di Labor (DAO) y e secretariado di e comision aki ta bou encargo di sra. Lupita Gildi CEDEHM.
Na final, sra. van der Biezen ta pidi e cooperacion di tur experto pa aporta den e diseño di e plan aki, ya cu e ta necesario pa Aruba. Aruba como pais tin cu raporta na organismointernacional, ya cu nos pais ta parti di e tratado di derecho di hende muhe. Na 2013 e rapport di UNICEF a mustra Aruba riba e progreso cu nos pais ta logrando, y e necesidad pa nos pais bin cu un politica cla riba maneho integral pa trata e desigualdad bou genero. E recomendacion aki ta uno serio y importante pa bin cu un maneho structural pa genero.
