Comision Interamericano di Derecho Humano (CIDH) a condena diarazon ultimo e ciere di alrededor di cincuenta emisora y canal di television na Venezuela na 2017, y a haci “un yamado urgente” pa restablecimento di nan transmisionnan.
Den un comunicado e Comision a recorda Venezuela cu “cualkier restriccion na derecho di libertad di expresion mester ta basa riba un ley y resulta proporciona y estrictamente necesario pa protege metanan legitimo den un sociedad democratico.”
“Si berdad Estado tin e atribucion regla di administra e espectro radio-electrico, mester haci esaki den conformidad cu e principionan basico di derecho internacional,” a agrega.
E Comision a enfatisa cu e derecho internacional aki “ta prohibi restriccion di e derecho di libertad di expresion atraves di e abuso di e facultad di regula y administra e frecuencianan radio-electrico” cu a haci cu “e mayor parti di e medionan di comunicacion ta opera na Venezuela cu nan licencianan venci.”
“Tambe CIDH a declara cu “E procesonan di adhudicacion, revocacion y renovacion di licencia mester ta estrictamente regula pa un ley y guia pa criterio obhetivo, claro, imparcial, publico y compatible, pa un sociedad democratico.” A agrega cu “e proceso mester ta transparente; e decision den cual te concede o nenga e solicitud mester ta debidamente motiva y someti na un adecuado control hudicial.”
Pa tur esaki, CIDH a haci un yamado “urgente pa e restablecimento di transmision di e emisoranan di radio y e canalnan di television retira di aire.” E medionan clausura ta yega na 49 emisora y cinco canal di television, di acuerdo cu e datonan di e Comision.
E ultimonan afecta tabata e canalnan Colombiano RCN y Caracol Televisión y e emisoranan di Caracas 92.9 FM y Mágica 99.1 FM, di cualnan e frecuencianan a ser tuma pa dos emisora nobo vincula na e partido oficial.
