Comision Interamericano di Derecho Humano (CIDH) a celebra un conferencia di trabao, corespondiente na periodo di sesion number 165 na Montevideo – Uruguay, cu a tuma luga entre dia 23 y 27 di october, tocante e situacion institucional di Venezuela, caminda e punto principal tabata un debate riba asamblea nacional constituyente (ANC)
Francisco Eguiguren, presidente di CIDH a dirigi e reunion tocante Venezuela, unda a participa varios miembro di sociedad civil y representante di estado.
E Programa Venezolano di Educacion y Accion di Derecho Humano (Provea), Centro di Paz y Husticia (Cepaj) y Comision Internacional di Hurista (CIJ) a representa e grupo di sociedad civil durante e conferencia aki.
Mariely Valdez, inspector general di Tribunal Supremo di Husticia (TSJ) Venezolano, a bisa cu e poder hudicial na Venezuela tin independencia y autonomia financiero y administrativo.
Tocante Asamblea Nacional (AN) di Venezuela, Valdez a bisa cu e organo aki no ta traha corectamente pasobra ta den situacion di “desacato” pa motibo cu nan no ta cumpli cu disposicion legal y p’esey nan a cay den un omision legislativo, Anto ANC a tuma tur nan facultad, cu aprobacion di Tribunal Supremo di Husticia.
José de Jesús Orozco Henríquez y James L. Cavallaro, representante di CIDH cu tabata den e reunion encuanto Venezuela a pidi un solucion en vista di e situacion di separacion di poder na Venezuela, como tambe independencia di hues y independencia di tur e facultadnan di ANC.
Tur dato cu a sali di e reunion aki lo ta material pa usa den elaboracion di e di tres informe riba Venezuela, y cu lo ser añadi na e informenan cu e organisacion a produci na aña 2003 y 2009.
E di tres informe lo keda enfoca riba institucion democratico, violencia y siguridad ciudadano, libertad di expresion y afectacion di tur derecho humano social y cultural na Venezuela.
