Den su rapport emiti dia 25 di augustus ultimo, e Comision di Nacionnan Uni encuanto Eliminacion di Discriminacion Racial a reuni su conclusionnan riba e rapportnan combina 22 – 24 di Reino Hulandes.
Den esaki e Comision a comenta bao di punto 29 y 30, e asunto di e condicionnan cu Reino Hulandes a impone riba e islanan autonomo Aruba, Curaçao y Sint Maarten, pa e ayudo cu a duna nan den cuadro di e asistencia pa combati efectonan di e crisis di e pandemia di Covid-19. E rapport a atende tambe otro tema manera e debate na Hulanda encuanto celebracion di fiesta di Sinterklaas y e aspecto di Zwarte Piet. Aki nos ta limita nos na e asunto di e condicionnan imponi pa e ayudo relaciona cu e crisis di Covid-19.
E texto di e observacionnan concluyente tabata, manera ta sigui:
Discriminacion di ciudadano Hulandes naci den Caribe
29. E Comision ta preocupa pa un informe cu apoyo economico provei na e paisnan Hulandes Caribense den e contexto di e pandemia di COVID-19 tabata mara na condicionnan y por lo tanto tabata menos favorable cu esun duna na Hulanda Europeo, proveyendo menos asistencia pa alivia e impacto economico negativo na e minorianan etnico den e paisnan di Hulanda Caribense. E Comision tambe ta nota cu preocupacion reportenan encuanto obstaculo pa pueblonan di e parti Caribense di Reino Hulandes pa realiza completamente nan derecho di autodeterminacion.
E Comision ta ademas preocupa pa reportenan cu dentro di Hulanda Europeo, poder legislativo Hulandes y gobiernonan local ta diferencia entre ciudadano Hulandes naci den Hulanda Europeo, y esnan naci o migrando di Caribe Hulandes, por ehemplo den termino di libertad di movimento (art. 2, 5).
30. E Comision ta recomenda pa e Estado evalua e impacto di e apoyo economico provei durante e pandemia di COVID-19 riba e poblacion di e paisnan di Caribe Hulandes, compara cu e impacto riba e poblacion di e parti Europeo di Hulanda, y sigura cu no a sucede ningun discriminacion den gozo di nan derechonan bao di e Convencion. E Comision tambe ta recomenda pa e Estado sigura autonomia di e pueblonan den e parti Caribense di Reino y sigura nan participacion den procesonan di toma di decision den e Estado cu ta di particular interes pa nan. E Comision ademas ta recomenda pa e Estado ta involucra den un dialogo cu representantenan di e poblacion di e parti Caribense di Reino cu a ser dsicrimina pa via di nan origen racial o etnico percibi, pa por comprende y atende nan preocupacionnan. E Comision tambe ta recomenda pa e Estado tuma medida pa atende cualkier discriminacion contra, y promove igualdad entre ciudadano Hulandes naci na Caribe Hulandes y esunnan naci na Hulanda Europeo.
Traduccion: Redaccion Bon Dia Aruba
Lista di palabracion di IPKO 2021 grandemente den luz di landspakketnan
Maneho Financiero y Belasting
E tema di Maneho Financiero y Belasting ta parti di e landspakketnan y como tal, tabatin intercambio di experiencia, cu ta inclui e obstaculonan pa cobra belasting. Entre e problemanan ta falta di personal adecua y experticio. E conclusion di IPKO ta cu e tema ta compleho cu ta rekeri sosten y intercambio constante entre e paisnan.
A discuti tambe e papel di tratadonan di belasting y di comercio y e posiblidad y oportunidad cu nan ta brinda pa tur e cuater paisnan di Reino.
Tambe a papia di e calculacion financiero di programanan di eleccion, manera ta e caso na Hulanda, unda Centraal Planbureau, CPB ta encarga cu esaki. E calculacionnan aki ta hunga un papel importante den e proceso democratico ora ta trata maneho financiero.
E delegacion di Hulanda a compromete pa puntra Gobierno di Hulanda riba e acceso na tratadonan comercial, den luz di oportunidad pa posicion di concurencia y risico; e posibilidad pa CPB haci e calculacionnan pa programanan di partido, manera ta e caso na Hulanda.
Finalmente, tur delegacion a urgi nan respectivo Gobierno pa duna mas bista riba e formacion, riba e progreso di mehoracion di cobranza di belasting, relaciona cu e palabracionnan haci riba e landspakketnan.
