Diahuebs mainta na Dr. Horacio Oduber Hospital a tene un rueda prensa caminda a duna informacion tocante e rapport ‘Cuido di nos Cuido’. Esaki a wordo traha pa e comision Nationale Commissie Kosten Besparing Medische Zorg, un comision cu a wordo institui bao di mandato di Minister Dangui Oduber, y forma door di tur grupo cu ta pertenece na e sector di salud. Esaki despues cu negociacionnan cu Hulanda a cuminsa pa motibo di e sosten financiero cu Aruba tabatin mester.

E Nationale Commissie Kosten Besparing Medische Zorg a keda encarga di traha y presenta e rapport ‘Cuido di nos Cuido’ cu e meta pa cumpli cu un di e condicionnan cu a bin dilanti durante e negociacionnan cu Hulanda, cual tabata pa reduci e gastonan den area di salud. “Esaki ta algo cu naturalmente a crea un conclusion den un carta di 8 di mei 2020 caminda CATP a bisa cu e ta bay ta un reduccion di 5 miyon. Dia 15 di mei 2020 Rijksministerraad pa medio di Secretario di Estado Knops a cambia locual ta e exigencia aki na un exigencia di 5 miyon florin pa luna”, Ronald van Trigt, presidente di e Nationale Commissie Kosten Besparing Medische Zorg, a bisa.

Rijksministerraad a duna un condicion specificamente na AZV pa corta 5 miyon florin pa luna for di nan presupuesto.“For di e prome instante cu esaki a tuma luga, e sector salud ya caba pa medio di un carta oficial di juli 2020 a informa e gobierno, parlamento y tambe Hulanda mi ta kere, cu e consecuencianan di e 5 miyon aki lo no ta sostenibel ariba corto plaso pa salud na Aruba,” Van Trigt a bisa.

AZV a cuminsa corta presupuesto for di juli 2020. Esaki a continua te cu januari 2021. Despues di a corta sumanan grandi for di e base di cuido, a dicidi di manda un carta caminda a bisa cu ta imposibel pa wanta un reduccion di 5 miyon florin pa luna, pa motibo cu asina no por garantisa e cuido medico cu Aruba mester. Pa e motibo aki e Nationale Commissie Kosten Besparing Medische Zorg a keda institui, pa trece pa dilanti un plan efectivo pa e sector di salud pa e proximo añanan.

“E rapport ta un documento hopi extenso y tin e sosten unanime di henter e grupo cu ta representa e sector di salud. Den dje naturalmente tin un vision di con nos cuido mester ta pa e proximo añanan cu ta nos dilanti,” Van Trigt a bisa. “E punto di discusion cu ta keda si ta cu naturalmente tin un decision firma door di Aruba y exigi door di Hulanda, cu riba un corto termino, nos mester sigui corta den salud mensualmente. Esaki ta algo cu den e rapport cu e grupo di cuido a pone hunto, ta wordo cuestiona seriamente”.

Riba e pregunta cu a pesar cu tin reduccion di presupuesto pa e sector di salud, specificamente pa AZV, tin dokternan di cas ta ricibiendo ayudo di un praktijkondersteuner y tambe tin algun dokter di cas cu tin prikpost cu enfermeranan cu ta atende pashentnan pa saca sanger y haci test, Joaquin van Trigt di Asociacion di Dokternan di cas a bisa: “E praktijkondersteunersnan ta cay bao di responsabilidad di Wit Gele Kruis y nan tambe, cu mi ta compronde, a wordo afecta pa e corte. Mi ta asumi cu e hendenan pa saca sanger ta bin di laboratorio, y tin praktijk cu tin un prikpost, y dus laboratorio claro tambe ta parti di e zorg sector cu a wordo afecta door di e corte”.

Ronald van Trigt ta sigura cu cambionan di e magnitud cu ta referi na dje den e rapport ta cambionan cu mester di sosten di henter e comunidad di Aruba. No solamente sector di salud, pero tur esnan cu ta bay tin consecuencia di e cambionan cu ta bay presenta.