Te aworaki no tin ningun desaroyo riba e tema di refineria. Esaki a pesar cu sindicato IOWUA y tambe fraccion di oposicion (AVP) y di coalicion (MEP-POR-RED) den parlamento a pidi gobierno pa haya un bista di e situacion actual di e refineria den man di Citgo Aruba.
Diahuebs prome minister, Evelyn Wever-Croes a bisa cu ‘no tin ningun adelanto’. Sinembargo el a laga sa cu gobierno ta den spera di dos proceso andando.
Procesonan
Un tin di haber cu opinion legal di expertonan di e comision cu nan a institui pa duna e gabinete actual un conseho riba e contract. Tambe riba con fuerte e contract aki ta pa garantisa su cumplimento si of no. Tambe pa wak si Citgo ta den cumplimento of no di loke a wordo acorda den e contract aki. Segun e prome mandatario nos tur por tin un impresion, pero nan kier haya e impresion aki for di e expertonan mes.
E di dos proceso cu gobierno ta wardando rond di e refineria tin di haber cu Citgo mes cu kier bin Aruba pa delibera cu e gabinete nobo. Sinembargo premier Wever-Croes a laga sa cu nan a bisa Citgo for di adelanta cu si nan ta bin pa reuni cu nan ta pasobra nan tin cosnan concreto riba mesa. “Ya nos no kier papia di promesa. Nos no kier papia di cosnan cu no ta contundente. Nos kier sa concretamente kico ta e inversionnan y kico ta e compromisonan”, el a bisa.
