Despues di ta activo durante 6 eleccion, Comision di Bon Boluntad (CBB) no lo ta activo den eleccion 2017. Asina directiva di Camara di Comercio y Industria di Aruba (KvK) ta informa Bon Dia Aruba.
Comision Bon Boluntad ta un iniciativa di e gremionan comercial y sindical cu den cuadro di nan responsabilidad civico, a duna nan contribucion durante e ultimo eleccion treciendo mas confiansa den e sistema democratico Arubano. Tambe e miembronan di comision aki cu tabata representa diferente gremio di sociedad trahando a base boluntario pa percura mantene un ambiente di respet entre e partidonan y nan politiconan cu a yega di participa den e proceso electoral.
No ta conoci e motibonan of argumentonan di directiva di KvK pa no bin cu e Comision di Bon Boluntad den eleccion di luna di september proximo; y tampoco no ta conoci si otro gremio lo sigui carga e iniciativa aki. Meta principal di e comision tabata pa logra un campaña electoral limpi, transparente y di nivel. Pa logra esaki nan tabata garantisa oportunidad igual pa cada partido politico durante e proceso electoral; y evita actonan di violencia, destruccion of cu ta stroba partido politico di funciona.
Comision Bon Boluntad
E comision tabata activo durante e eleccionnan pa miembro di parlamento na aña 1994, 1997, 2001, 2005, 2009 y 2013. Ya caba den eleccion ultimo nan a introduci algun cambio, pa ehempel na 2013 CBB no a pidi e partidonan politico ni medio di comunicacion pa firma un convenio. Tur cos a bay a base di confiansa pa tur partido politico y medio di comunicacion por a mantene un bon conducta y cumpli cu e reglanan di e campaña electoral y normanan di bon conducta pa logra conhuntamente un campaña limpi y di nivel halto. E parti di campaña limpi tabata inclui cierto aspectonan, entre nan: recaudacion di fondo pa campaña; con pa anda cu donacion; con pa presenta un programa di partido y con pa vota.
Tambe nan tabata conscientisa y motiva publico en general tocante importancia di un campaña limpi. Nan tabata divulga regularmente informacion na prensa tocante reglanan legal entre nan abstene di divulga encuesta na bispo di eleccion. CBB a yega di desaroya instrumento pa monitor e campaña y eleccion; y te hasta evalua nan. Tambe nan a desaroya un instrumento pa registro y evaluacion di keho, desaroyo positivo y recomendacionnan pa tur partidonan den campaña y eleccion. Pues e funcion di CBB no solamente tabata varia sino fundamental pa garantisa un bon clima electoral.
Den eleccion ultimo di 2013 e comision aki tabatin e siguiente miembronan: Glenn Thodé (presidente); Leo Maduro y Ivi Hernandez-Swaen (secretario); Igmar Reyes (dunado di trabou); Rudy Geerman y Hubert Dirksz (sindicato); Ava Thode (enseñansa); Pader Rey Nares (clero); Trudy Hassell y Aldrick Croes (cuerpo policial); Marylin de Kort (Parlamento Hubenil); Birgit Kreykenbohm (liaison cu prensa).
Debate electoral
Loke si ta conoci ta cu e aña aki KvK lo organisa dos debate electoral cu logicamente ta totalmente otro cos cu e tarea y meta cu CBB tabatin. E debatenan lo tuma luga dia 8 di juni y 17 di augustus. KvK a yega di divulga cu pa medio di e debatenan kier brinda e oportunidad na e votadonan conoce kico ta e programa di e partidonan politico den eleccion proximo. Tambe e instancia lo invita e lider of e representante di partidonan cu ta den Parlamento di Aruba pa forma parti di e debatenan. Ta asina cu via un encuesta online lo scoge cua lo bira e otro 2 partido politico cu no tin representacion den parlamento cu ta participa den e debate electoral a base di esun cu haya mas voto.
Entrante 3 di april 2017, KvK lo lansa su encuesta riba su website www.arubachamber.com pa publico por vocifera cua partido nan lo kier wak tambe den e debatenan. Publico tin te dia 18 di april 2017 pa por indica su escogencia den e partidonan politico cu lo wordo menciona den e encuesta. Di e forma aki e partidonan politico por elabora riba nan puntonan y splica pueblo dicon nan merece e confianza di e votadonan pa goberna e siguiente cuatro añanan. Pa tal motibo KvK ta urgi tur otro partido cu ta desea participa den e debatenan pa nan entrega nan statuut y nan programa/manifiesto di eleccion; y entrega e documentonan aki no mas tarda cu 31 di maart.
