Ministro di husticia, Andin Bikker (POR) a splica tocante e sistema automatisa ‘SIRSA’ cu ta procesa peticion di prolongacion automaticamente. El a yega di bisa cu a institui den articulo 35, a base di e ley di admision cu a wordo modernisa den parlamento december ultimo.
Nan a pone cu ta bay tin un comision di conseho cu ta procesa diferente reclamo cu por tin pa locual ta trata proceso di permiso. E mandatario ta duna ehempel, cu si ora un persona bay aplica pa un prolongacion di permiso, anto si paspoort no ta valido, pa e motibo ey e permiso ta wordo nenga.
Esey ta nifica cu un persona no mester pasa den henter e proceso di bay apela te yega na corte. E ora articulo 35 lo evalua e tipo di caso, y lo conseha pa e ora ey e persona trece un paspoort valido, asina no mester nenga un permiso y ta resolve e preocupacion asina di e persona.
Sinembargo, tin persona cu ta bay aplica pa su permiso, anto ta falta un papel. Sea ta un copia mes cu falta, no ta acepta e documento, sino e persona mester busca otro cita.
Esey ta pone cu e persona tin cu keda den estado ilegal pa warda su cita di nobo, cu ta tarda 1 luna pa bolbe aplica.
Esey ta perhudica e persona, sea den su seguro, of ta crea buraco den su permiso. “Si ta un papel cu falta, no ta djis saca un copia y entrega tur documento? Pakico mester pasa atrobe pa henter e proceso? No ta manera documento ta caduca”, un persona, kende tabata haci entrega di documento na luga, a expresa.
