(Reuters) – Dos lider di U.S Consumer Products Safety Commission ta haciendo yamado pa e agencia investiga e negoshinan online Shein y Temu despues cu “productonan pa baby y mucha chikito mortal” a ser bendi riba ambos website, segun un carta publica riba e agencia su website diamars.
CPSC Comissioner Peter Feldman y Douglas Dziak kier e agencia evalua con Singapore su Shein, China su Temu y otro plataformanan di comercio online stranhero ta cumpli cu su reglanan, ta manera relacion cu bendedornan di tercer partido y ta representa productonan importa.
Shein y PDD Group su Temu, cual ambos ta exporta mercancia pa un prijs abao na Merca for di China, ta causando “preocupacion specifico” pa e Comision a causa di nan uso di ‘de minimis’, un regla cu ta exclui paketenan di menos di 800 dollar den balor di tarifanan si nan ta manda directamente na hendenan cu haci e compra.
Un vocero di Shein a bisa cu e compania ta invirtiendo miyones di dollar den fortalece su programanan di cumplimento. Anteriormente e aña aki, Shein a anuncia cu lo inverti 50 miyon dollar den programanan di cumplimento pa garantisa cumplimento estricto na e standardnan di seguridad di producto y regulacionnan cu leynan local.
Temu lo coopera cu cualkier investigacion di Merca su CPSC segun vocero di e compania. E bendedor ta rekeri pa tur persona cu bende riba e website cumpli cu leynan y regulacionnan aplicabel, incluyendo esnan relaciona cu seguridad di producto, e vocero a declara.
Criticonan di Shein y Temu ta atribui e prijsnan abao y ‘de minimis’ na Shein y Temu su exito na Merca. Ambos compania tambe a ricibi critica pa e calidad di nan producto.
Un grupo bipartisano di legisladornan Mericano ana pasa tabatin plan di introduci un proposicion cu ta elimina e regla ‘de minimis’, cual ta ampliamente usa pa plataformanan di comercio, incluyendo bendedornan di tercer partido riba Amazon.com y walmart.com.
