Como minister encarga cu e prome Ministerio di Asuntonan di Adulto Mayor, durante tratamento di presupuesto 2024, Minister Ursell Arends a elabora ariba diferente punto cu ta relaciona na e ministerio aki y a informa tocante plannan pa futuro pa mehora cuido pa adultonan mayor na Aruba.

Minister Arends a recorda cu e aña aki Gobieno di Aruba a organisa e prome Foro Nacional pa Adulto Mayor riba 17 y 18 di october, y ariba dia 19 di october e decreto nacional a keda cla pa establece oficialmente Directie Ouderenzaken. For di e foro nacional aki a firma un convenio nacional y durante e foro tambe Minister Arends a presenta e ‘delta plan’ pa loke ta e politica pa asuntonan di adulto mayor di 2023 te cu 2032.

“Nos adultonan mayor, mi ta considera nan como e tesoro di nos pais. Nan a traha duro pa e Aruba cu nos a hereda awe y sigur ta nos deber pa duna nan un bon calidad di bida y tambe un bon calidad di cuido,” el a enfatisa.

Despues di e Foro Nacional di Adulto Mayor, Minister Arends a indica, gobierno a establece un stuurgroep ‘Foro Adulto Mayor’ (FAM), y ya caba e comision aki a sinta na tres ocasion. E comision ta consisti di un representante di FTA, KvK, un representante di eFondo di Pensioen di Sector Turistico y tambe un representante di AHATA. E di cinco representante ta di Gobierno di Aruba, cu ta encarga cu e secretariado.

Pa loke ta e aña binidero, e mandatario a informa cu dia 8 di januari tur e 24 firmantenan di e convenio nacional lo bin hunto pa scoge cual di e sub-comisionnan lo forma parti di dje. Dia 19 di februari ta bay presenta un tussenrapport na Gobierno di Aruba, dia 4 di maart ta bay duna un presentacion y dia 13 di maart ta bay tuma luga e di dos Foro Nacional pa Adulto Mayor na Aruba.

Casnan di Cuido

Tocante e tema di permiso pa cas di cuido, Arends a splica cu pa e aña aki for di un total di 13 cas di cuido, seis a ricibi nan permiso y pa siete di nan e permiso ta den proceso na e momentonan aki. “Mi ta spera cu por keda cla cu Aruba ta certifica tur 13 cas di cuido y cu tur por tin nan permiso pa opera debidamente,” el a agrega.

Minister Arends a señala tambe cu den e MoU cu su ministerio a firma cu Xavier University, ta bay lansa un programa di educacion pa dunadornan di cuido. Esaki ta un programa di educacion di 18 luna cu ta bay tin como meta pa eleva e calidad di cuido cu ta brinda tambe den e casnan di cuido.

El a sigui splica cu durante 2024 gobierno ta bay lansa diferente proyecto piloto den e prome kwartaal di aña y un di nan ta bay over di inloophuizen (centronan di acogida) pa adulto mayor. Esaki lo ta centronan na unda adultonan mayor cu ta keda cas henter dia por pasa nan dia, y na mesun momento nan por ricibi tratamento di profesionalnan na e centronan aki.

Minister Arends a informa tambe cu na comienso di 2024 ta bay habri un di dos Cas Marie, cu ta bay situa na Santa Cruz. Esaki ta un partnership entre sector priva y Cas Marie y Gobierno di Aruba ta brinda e subsidio na Cas Marie.

E di dos cas aki lo yuda cu cuido di un total di 16 persona cu tin malesa di Alzheimer por bay pasa dia eynan. Fuera di esey, e mandatario a agrega, den presupuesto 2024 tin suficiente fondo pa Cas Marie por cuminsa habri siete biaha pa siman en bes di habri solamente cinco biaha pa siman.

Leerwerktraject pa cuido di adulto mayor

Minister Arends a indica cu door di e Foro Nacional pa Adulto Mayor a haci afspraak tambe cu ta bay traha riba dos proyecto. Un di nan ta un leerwerktraject (programa di aprendisahe) pa eleva e calidad di cuido di adulto mayor.

El a referi na e leerwerktraject cu Bushiri a brinda, caminda mayoria di hende cu tabata traha den sector hotelero a pasa door di Bushisri y unabes e personanan aki tabata drenta den e sector hotelero pa traha, nan no tabatin mester di guia.

Pa e proyecto aki, el a indica, nan a scoge e klooster na Noord pa haci un leerwerktraject conhuntamente cu un academia y diferente scol di Aruba. Y ta bay ta den cooperacion cu sector priva, na unda e academia lo brinda oportunidad na studiantenan den e ramo di cuido, di administracion y F&B, como tambe na studiantenan di EPB y SPO.

Pa loke ta e generational gap (buraco generacional) cu ta existi na Aruba y cu ta birando mas y mas extenso pa motibo di e dubbele vergrijzing cu tin, Minister Arends a remarca cu door di e crecemento lihe di e poblacion di adulto mayor na Aruba y como Minister di Asuntonan di Adulto Mayor, e tambe ta reconoce e buraco aki. “No tin mesun empatia, no tin mesun hopi cariño ta wordo brinda na nos adulto mayor di nos hobennan,” el a resalta.

E mandatario a splica cu e proyecto cu e klooster na Boegoeroei na Noord ta bay yuda tambe pa atende cu e generational gap aki, mirando cu den e mesun cercania tin Imeldahof. El a indica cu nan lo zorg tambe pa e hobennan cu adulto mayor por drenta constantemente den contacto cu otro.

Fuera di esey tambe, el a agrega, e studiantenan cu ta bay forma parti di e proyecto aki tambe ta bay tin contacto constantemente cu e adultonan mayor. “Di e forma nos ta bay atende cu e generational gap cu ta existi den nos comunidad,” el a subraya.

“Tin varios reto pa loke ta adultonan mayor y conhuntamente nos ta atendiendo cu esaki y nos ta traha den forma horizontal, nos ta aborda e problematica tambe den forma horizontal,” e mandatario a indica.