James Comey, ex director di FBI a contesta docenas di pregunta durante un testimonio explosivo cu a dura casi tres ora. E ex director a bisa cu e ta dispuesto na contesta mas pregunta tambe durante un testimonio priva. Comey ta acusa presidente Donald Trump di bisa mentira riba dje riba su retiro como director. Comey: “E splicacionnan a confundi mi basta hopi anto a preocupa mi mesora.”
Comey a insisti cu el a wordo retira como director di FBI pasobra e tabata investigando si en berdad Rusia a interveni den eleccionnan Mericano. Sr. Comey a laga sa cu e tin memos/documentonan detaya di reunionnan cu e tabata tin cu Donald Trump pasobra e tabata honestamente preocupa cu Trump lo gaña riba e motibo di nan reunion. Si tin algun grabacion cu a wordo haci esaki, segun conseheronan legal, Casa Blanca mester entrega esakinan na autoridadnan. Fuera di Tweets cu Trump mes a publica, no tin evidencia si en berdad e combersacionnan entre Trump y Comey a wordo graba.
