Durante su prome conferencia di prensa pa aña 2021, presidente di Camara di Comercio (KvK), Omar Tromp a referi riba e reunion cu nan a sostene recientemente cu Sr. Anton van der Kruk kende ta forma parti di e grupo preparatorio pa e Caribisch Hervormings en Ontwikkelingsorgaan (COHO) pa atende cu e tema di landspakket.

Tambe el a referi riba e necesidad di flexibilisa e ley laboral pa mitiga e posibilidad di un crisis social mas severo.

Reunion

Durante e reunion cu Sr. van der Kruk, nan a bin cu nan potencia pa envolvi e gremionan tanto comercial como sindical mas activamente den e tratamento di e landspakket. Presidente di KvK a considera e reunion “basta fructifero.”

Tambe nan a trata e tema di e ley laboral y tambe esun di reforma fiscal. Loke KvK kier wak ta un ley laboral mas flexibilidad teniendo na cuenta e parti di proteccion pa e trahadonan cu mester keda den e ley aki. Tambe nan ta mira hopi ley laboral anticua den nos ordenamento huridico y KvK ta haya necesario pa bin cu reforma riba e tereno aki.

Tromp a remarca cu Aruba ta e unico pais den Reino Hulandes cu tin 1613X, caminda e dunado di trabao no tin espacio pa duna un hende un trabao pa tempo stipula. Presidente di KvK ta haya cu e 1613X ta algo cu mester elimina. KvK ta pendiente di un reunion Tripartiet cu gobierno a priminti di bin cune for di december ultimo caba, pero e no a tuma luga ainda.

Ayudo y restructuracion

KvK como gremio comercial ta haya positivo cu gobierno a bin cu cierto ayudo, entre nan esun di loonsubsidie y FASE. Pero e pregunta ta con leu e ayudonan lo sigui dura, considerando e situacion dificil cu nos ta aden. E gremio comercial aki ta compronde cu e tipo di ayudo menciona lo wordo mantene durante 2021.

Tromp a reconoce cu alomenos e subsidio di salario ta yuda pa mantene cuponan di trabao, y tambe e ta yuda pa mantene cierto “negoshinan a flote.” Pero nan no sa pa cuanto tempo mas nan por wanta, particularmente mirando e situacion cu nos turismo a wordo afecta severamente.

Loke si KvK kier wak ta e implementacion di un sistema caminda bo por reorganisa bo compania, specialmente e personal na servicio di e compania. Ya cu si e subsidio di salario caba y e compania ta keda mantene e hendenan na trabao cu no mester di nan, e ta bay caba cu e compania. Pues e ta haya cu mester duna espacio na e companianan pa restructura nan mes.

Di otro banda, KvK ta di opinion cu ta prudente pa e reforma fiscal lo bay den direccion di impuesto indirecto pa medio di un sales tax of BTW cu lo reemplasa e otro formanan di impuesto.