Comercio y ATIA preocupa cu no ta bahando carga na tempo den e temporada crucial pa comercio

ATIA a ricibi un cantidad substantial di reclamo y keho di comercio cu netamente den e temporada cu comercio ta depende hopi ariba dje, cual ta fin di aña, diripente tin un cantidad di container cu no ta yega/wordu baha na Aruba.

ATIA a trata di hanja sa exactamente kiko ta pasando y inofficial a bin tende cu un barco cu mas di 100 container a duna previo aviso cu lo jega Aruba laat pero no obstante, no a ser acomoda pa baha container mesun dia. Consecuentemente e barco aki a sali bai cu tur e containernan destina pa Aruba pa bolbe despues.

Comercio ta depende pa casi 100% di productonan cu mester wordo importa di exterior.

Pa esaki comercio ta paga un prijs sumamente halto pa servicio di baha y importa e containernan aki for di waf.

ATIA a tuma nota cu pa motibo di un decision pa no acomoda e barco aki pa baha su cargo, un gran cantidad di producto no ta disponibel ariba nos isla, entre otro producto cu mester den sector hotelero y restaurant (nos pilar economico principal) pero tambe diferente otro articulo cu mester pa tur sector di nos economia. Un gran cantidad di e containernan aki ta contene producto den container frieuw cu lo mester warda awor pa wak si esaki lo drenta Aruba fin di siman.

ATIA ta compronde tambe cu tin tension bow di trahadornan di ASTEC. Un interupcion di servicio di container den e temporada di fin di aña lo tin consecuencia desastroso pa Aruba su comercio. Pa e motibo aki, ATIA ta hasi un apelacion urgente ariba e partidonan envolvi pa tene cuenta cu e bienestar general di Aruba y comercio den e temporada crucial pa comercio, cu ta temporada di fin di aña.

ATIA lo trata di ricibi informacion di ASTEC pa hanja sa kiko ta causa di e retraso serio aki, y purba evita cu e situacion aki ta empeora. Nos ta ricibi informacion cu na e waf nobo, aunke cu tin espacio pa acomoda y baha 2 barco pareu, e compania encarga, no ta hasi un excepcion di atende 2 barco. Con por ta posibel cu den un periodo crucial pa comercio ta keda implementa cu ta un solo kraan y un solo slot ta wordo usa pa baha container? Nos tin e facilidadnan completamente nobo pa atende cu 2 barco pareu den nos waf. Pakiko no hasi uso di esaki ora tin hopi barco pa atende of ora cu tin emergencia?

E consecuencia di e maneho aki ta naturalmente pa comerio cu ta keda sin producto y ta perde benta. E consecuencia ta pa pueblo cu no por ricibi producto cu nan ta acustumbra cune. Aruba ta un isla cu mester di un systema sumamente eficiente den e proceso pa drenta mercancia. E siman aki ta mustra cu nos no tey ainda, y cu falta hopi pa e proceso mas crucial pa comercio y Aruba su economia, funciona na un nivel aceptabel, segun ATIA.

ATIA ta trata semper na un manera positivo pa contribui na soluciona situacionan cu ta afecta comercio. Nan como gremio comercial ta haci un apelacion na tur instancia, companianan, sindicato y trahadornan envolvi den e proceso aki, pa hasi lo maximo pa nos comercio y Aruba su economia no wordo afecta den e temporada crucial nos dilanti.

ATIA lo keda vigila e proceso di cerca den e dianan venidero.