E comercio entre Merca y Cuba ta sigui crece, a pesar di e anuncio di presidente Donald Trump, ken na juni a priminti na Miami di lo endurece su politica pa cu e Isla.

“Compra di alimento di Cuba na Merca a disminui pero a habri un sector amplio a base di e medidanan di flexibilisacion di presidente Obama cu a permiti un incremento di e cantidad di vuelo, di telecomunicacion, turismo y remesa,” Emilio Morales, director di The Havana Consulting Group (THCG) ta splica.

E estadisticonan facilita pa THCG ta revela cu a efectua 8.287 vuelo den prome mita di 2017,es decir casi un 180% mas en comparacion cu e mesun periodo di e aña anterior. “E cifra aki ta 3,45 biaha mas halto cu esun logra na januari 2014, e aña den cual a inicia cu e ‘deshielo’ den e relacionnan entre Washington y La Habana,” e experto ta bisa.
Dia 31 di augustus 2016, JetBlue cu su prome vuelo di Fort Lauderdale pa Santa Clara, a duna inicio na normalisacion di e relacionnan aereo entre ambos pais. A pesar di cu e vuelonan pa e isla ta bay apenas cu 51% di nan capacidad, Morales ta kere cu e principal aerolineanan lo mantene nan operacion “pustando riba futuro”.
Desde algun luna, algun aerolinea manera Silver Airways, Spirit Airlines y Frontier a suspende o reduci nan biahenan pa e Isla. The Havana Consulting Group ta opina cu e empresanan a “comete eror den nan proyeccion di mercado y no por a soporta e golpinan di e competidonan mas grandi.”

“E magnitud di comercio entre ambos nacion no mester ser midi via e tradicional importacion di producto alimenticio, cu e gobierno Cubano a uza pa haci lobby anti-embargo, segun e experto. Na momento di tension entre ambos pais, gobierno Cubano tabata stop di importa alimento, principalmente galiña y aros, y tabata cumpra nan otro caminda na prijs mas halto. E productornan Mericano anto tabata presiona nan gobierno pa flexibilisa su politica pa cu e Isla.

Segun John S. Kavulich, presidente di e Conseho di Comercio y Economia di Merca-Cuba,
e exportacion di alimento y producto agricola di Merca pa Cuba na juni di 2017 a subi te
US$24,6 miyon, compara cu US$11.2 miyon di e luna anterior y US$9.5 miyon di juni 2015.

Oficina Nacional di Estadistica y Informacion ta bisa cu Cuba a importa di Merca US$261,7
miyon na alimento aña pasa. E negoshi di biahe pa e isla ta ser calcula na US$1.800 miyon, den e prome mita di 2016 so. “E medidanan di Trump no lo afecta mayoria di e negoshinan aki,” e experto ta opina, aunke e ta señala cu e regulacionnan cu ta impedi bishita individual ta forma “un muraya chikito” cu a causa un bahada den e reservacionnan di e portal di vacacion Airbnb.

Aña pasa 613.937 persona a biaha di Merca pa Cuba, di nan 329.000 tabata Cubano y 284.937ciudadano Mericano.