(NLTimes) – Autoridadnan Hulandes mester haci hopi mas pa combati comercio di steroid anabolico. E potenciadornan muscular aki ta disponibel facilmente y barata online, y decenas di miles di residente Hulandes ta usando nan, segun expertonan a bisa NRC.
Autoridad Hulandes di Doping ta calcula cu entre 40mil y 50mil persona na Hulanda actualmente ta haci uso di steroid anabolico. “Nos ta teme cu e uso lo aumenta mas, y cu e usuario averahe ta bay bira mas jong”, segun Herman Ram, director di Autoridad di Doping, a bisa e corant.
Decenas di website den idioma Hulandes ta bende steroid. “Lo ta bon pa purba di combati e industria aki, pasobra awo ta hopi facil pa hay’e y no ta caro en absoluto”, segun Pim de Ronde, fundador di e prome clinica pa pashent di steroid na Hulanda, a bisa na NRC.
E comercio den steorid anabolico tambe ta lucrativo, cu bendedornan coriendo tiki peliger di wordo gara, segun e corant. E maneho riba comercio di steroid ta fragmenta, cu varios autoridad compartiendo parti di e responsabilidad, pero ningun tin e bista completo.
Steroid anabolico ta deriva di testosterona, cu ta promove construccion di proteina y como resultado ta aumenta masa muscular. Pa motibo di e efecto aki, e tipo di steroid aki ta hopi popular entre atletanan manera bodybuilder y den arte marcial.
Steroid tin un ‘influencia directo riba salud publico’ y politiconan mester duna mas atencion na e problema, segun Ram di e Autoridad di Doping a bisa.
Un vocero pa minister Tamara van Ark, pa Cuido Medico, a bisa NRC cu e ministerio ta bay responde na e reporte aki despues di vakantie di berano.
