(NLTimes)—Criminalnan Hulandes ta keda envolvi den traficacion di droga den henter Europa, segun Europol a bisa den un rapport cu ta mapa e netwerk di crimen mas peligroso den e continente. Segun e organisacion policial Europeo, criminalnan Hulandes ta envolvi den netwerk di traficacion pa tur droga cu nan a analisa. Crimen organisa Hulandes tambe ta envolvi den fraude fiscal y traficacion di hende.
Europol a identifica 821 netwerk criminal envolviendo al menos 25,000 criminal. E netwerknan aki ta capable di causa “daño significante na seguridad publico, regla di ley y e economia,” Europol a bisa.
Al menos mita di e netwerknan identifica ta envolvi den traficacion di droga. Europol a lista 113 gang criminal cu ta enfoca principalmente riba e traficacion di cocaina, 44 riba cannabis, nuebe riba droganan sintetico y 111 riba varios diferente droga. Hulandes ta un di e nacionalidadnan mas comun entre e criminalnan envolvi den traficacion di tur e droganan aki, y Hulanda ta riba lista como un di e “paisnan principal di actividad” pa cada un. Segun Europol, e rol central di Hulanda den traficacion di droga tin di haber cu su wafnan, cual frecuentemente tin conexion directo na paisnan produciendo droga.
Criminalnan Hulandes tambe ta bon representa den e 34 netwerk criminal envolvi den fraude fiscal y 11 netwerk cometiendo crimen di propiedad. Y Hulandes ta un di e paisnan principal di actividad pa skemanan di fraude online, manera inversion y fraude di romance.
Hulanda tambe ta un pais principal cu actividad ora ta trata di traficacion di hende pa explotacion laboral. Aunke criminalnan Hulandes no ta demasiado envolvi den e netwerknan criminal activo den e area aki.
Segun Europol, mayoria netwerk criminal ta hopi diverso pa cu nacionalidad. 68% ta consisti di hende cu ta varia entre 2 pa 10 nacionalidad, mayoria cu ambos nacionalidad Europeo y no Europeo.
E organisacion a menciona specificamente un “grupo distinto” di “netwerknan criminal Belga-Hulandes.” Segun Europol, criminalnan Belga y Hulandes ta trahando hunto debi na nan idioma comun, proximidad cercano y bon infrastructura di caretera entre e luganan relevante manera e wafnan di Rotterdam y Antwerp pa traficacion di droga.
Na un conferencia di prensa presentando e rapport, lider di Europol Catherine de Bolle a describi esaki como un herment clave pa aborda crimen organisa. Tambe el a adresa netwerknan criminal directamente. “Nos sa ken bo ta, kico bo ta haci, pa ken bo ta traha,” el a bisa. “Bo no por sconde mas.”
