Frans Ponson ken ta fungi como presidente di Comerciantenan Uni Aruba (CUA) ayera a tene un conferencia di prensa pa trece dilanti e preocupacion cu nan tin pa loke ta trata Aruba Fair Trade Authority (AFTA) e cual ta e autoridad independiente encuanto competencia di Aruba, un organismo administrativo cu personeria huridico.

Mededingingsverordeningn a ser aproba na Parlamento di Aruba dia 3 di juli 2020 y a drenta na vigor recientemente caminda Ponson a sigura cu nan ta ser crea pa un compania no mal usa su poder den comunidad, kiermen si e ta un compania grandi cu por stipula prijs, e pueblo mester di dje.

“Si dos compania na Aruba stipula un prijs halto pasobra nan so ta bende un producto, nan no mag esey, esey ta algo cu nan a bin pa controla y no ta malo pa comunidad, pero pa ken esaki ta conta? E ta conta no solamente pa tur e comerciante na Aruba pero tambe ta conta pa companianan di gobierno tambe,” Ponson a bisa.

AFTA ta indica den su website cu nan ta prohibi abuso di poder dominante debi cu un compania cu un posicion fuerte dominante tin un posicion fuerte den e mercado cu ta capaz di comporta su mes di forma independiente dilanti su competidornan, proveedornan, clientenan of usuarionan final. Pa evita cu un compania cu un posicion dominante lo abusa di su posicion, ta aplica un prohibicion di abuso di posicion dominante. Sinembargo, no ta prohibi pa tin un posicion dominante.

Un compania tin un posicion dominante ora tin un cuota di mercado di 60% of mas, cu un cuota di mercado menor un compania tambe por tin un posicion dominante, por lo tanto, ademas di e cuota di mercado , tambe mester considera otro factonan. Factornan como posicion di mercado di competidornan existente y e posibilidadnan di e companianan di drenta den mercado.

Ponson a señala cu “prome cu bo kier bin den comercio, bin stipula si comerciantenan ta asi malo, nos ta haya cu bo tin cu wak den bo mesun seno prome, cu ta seno di gobierno, pasobra laga nos cuminsa papia riba SETAR, nan ta doño di Telearuba, ta doño di kabel por ehemplo, di companianan priva cu nan ta cumpra, nan a cumpra un compania di IT masha grandi mes cu ta ITP Caribbean, nan ta invirtiendo den camara, aworaki bo tin destaho publico cu SETAR ta bay destaho publico di camara y gana contra e comerciantenan cu nan ta bendiendo camara, nan ta comprando tur e companianan local cu ta algo inhusto,” el a sigura.

Den mesun rosea, Ponson a expresa cu ademas di SETAR ken ta un compania di gobierno y protegi pa gobierno, tambe tin Digicel ken no mag di bin cu su cabel y internet na Aruba, “nos no ta laga ni un compania bin pa competi cu SETAR, kiermen nos ta protege pa e keda gana hopi placa y cu e placa ey e ta cumpra e otro companianan tambe y competi den nan seno, con un compania chikito Arubiano den mundo di computer, con nan ta bay competi cu un monster asina grandi cu ta protegi door di gobierno?”

Den esaki, el a mustra e Jaarrekening di 2018, e ultimo cu gobierno a traha segun el a splica, gobierno a traha 7.5 miyon na dividendo di SETAR “kico esaki kiermen? Cu gobierno ta bay na tur panaderia na Aruba y stipula prijs, bo no por gana mucho pasobra no mag, tur supermercado na Aruba tin canasta basico pasobra nan tin cu protege e consumidor, unda e canasta basico di SETAR ta pa e pueblo?” el a puntra.

Den su opinion, Ponson ta señala cu ta inhusto cu ta protege un compania na Aruba cu “e so por haci algo, traha miyones y den bo cas bo no ta stipula prijs y ni un hende por bisa cu internet ta un luho pasobra awor e ta un necesidad, tur hende tin un yiu cu ta bay scol y mester di internet pa wak nan puntonan, eynan mes gobierno no ta stipula prijs, unda ta e fair trade? Bo no por scoge un internet di otro compania pasobra SETAR so tin.”

Pa AFTA cierto acuerdonan competitivo semper ta perhudicial, e acuerdonan aki ta denomina violacion grave y nan ta necesariamente prohibi.

Violacion grave ta acuerdonan entre companianan competidor of potencialmente competidor cu ta relaciona cu :

  • Determina e prijs di benta of otro condicion di benta.
  • Determina prijsnan di inscripcion of otro condicion di destaho publico pa e destaho publico.
  • Limita of controla e produccion di benta (por ehemplo cera fabrica)
  • Division di mercado por ehemplo, division geografico of division di clientenan.

E ta considera cu gobierno mester habri mercado pa companianan por bin Aruba y e ora ey pueblo ta dicidi cu ken nan kier traha “esey ta husto, den pueblo bo kier implemente pero den bo cas bo no kier implemente,” Ponson a comenta.

El a pone como ehemplo cu na China, e cual ta un pais comunista, gobierno ta cumprando tur compania priva “y esey nan kier haci na Aruba, kier cumpra sector priva, pero gobierno no por drenta den mercado di comercio y sinta y cumpra tur e companianan aki, e ta inhusto den tur sentido y ta contra tur principio di gobierno, no por competi cu sector priva y stipula prijs den comercio,” el a afirma.

Ademas el a bisa cu si e departamento aki kier haya tur e poder cu legalmente nan a haya, “nan mester cuminsa den cas di gobierno prome en bes di hinca tur e cos aki y bin den sector priva.”

Ponson a solicita na AFTA pa trece claridad pa comercio priva na unda el a sigura cu ora cumpra un compania grandi manera SETAR cu a cumpra Caribbean ITP “mi ta challenge un minister of un hende bin bisa mi cu nan a reporta e cos ki na AFTA, mi ta sigur cu no, tin consecuencianan pa companianan cu ta gubernamental of tin consecuencianan pa sector priva so?.”

Hopi miembro di Comerciantenan Uni ta preocupa pa esaki manera Ponson a afirma y tambe a ser afecta directamente pa trece e procupacionnan aki.