Comerciantenan Uni a tene un conferencia di prensa debi na diferente discusion cu tin den dianan aki den comunidad pa loke ta trata implementacion di BBO na frontera, cu ta bay tuma luga dia 1 di januari proximo. Segun e grupo comercial, esaki ta un topico alarmante mirando e tempo cu ta falta pa e dia ey yega.
Pa esaki, Francis Saladin a expresa cu tempo cu a introduci BBO riba su mes no tabata nifica un problema, pa motibo cu ora ta introduci un tipo di sales taxe tempo ey tabata na 3% na unda su impacto no tabata asina grave y e consecuencianan tabata mucho menos. Na dado momento a aumenta e BBO na 6% y eynan e problema a cuminsa.
For di e tempo ey, compania y hendenan mes a cuminsa cumpra di manera directo afo debi cu pa cumpra den mercado local tabatin un desbentaha di 6% compara cu un compania di afo. Otro problema cu nan ta mira di BBO ta falta di cumplimento (compliance). Tin hende cu ta bende mercancia pero no ta paga BBO y esey ta pone presion riba gobierno, ya cu nan no ta haya e placa cu mester haya di impuesto. Pero alabes esaki ta hacie inhusto pa esnan cu si ta cumpli. “Atrobe bo ta haya bo den un situacion cu ta inhusto y aki ta unda cu Comerciante Uni a papia e tempo ey di BTW, cu e idea tabata ta pa introduci un BTW version Aruba, algo mas simpel compara cu esun di Hulanda y a bin un discusion cu a start cu esey. Pero BTW ta basta complica, nos a bin e ora ey cu e idea di pakico no cuminsa cu un BBO na frontera? Como un cuminsamento di BTW y esey ta un di e puntonan cu nos a trece dilanti,” Saladin a informa.
Ora Reforma Fiscal a bira conoci, Frans Ponson a sigura cu gobierno kier a bin cu BTW cuatro luna prome na un cifra di 18% y cu esey lo a trece un caos riba e pueblo di Aruba. E tempo ey comerciantenan mes a bin cu un idea pa esaki.
Loke ta preocupante pa nan ta cu, segun Ponson, nan a pidi pa baha e BBO pero gobierno no a bay di acuerdo cu esey. Nan a puntra pa nan mes unda e profesionalnan cu tin propuestanan pa esaki ta? Pa asina nan por trece e puntonan di tur hende aden, cu por scucha nan y gobierno na final por tuma e decision. “Pero ta iresponsabel awe pa punta dede riba profesionalnan cu nunca tabata envolvi den ni un parti di e ley y cu ni un di nos a wake,” Ponson a expresa.
Igualmente a bisa cu a scucha cu a extende e fecha di 1 di juni pa 1 di juli, lo cual no ta confirma ainda, pero sinembargo, el a sigura cu pa 1 di juli mes comerciante no ta compronde ley y tur hende no ta bon informa, “pueblo boso ta bay haya un inflacion hopi mas grandi cu loke ta pinta pasobra hende no ta compronde ley y ta gobierno su trabou di duna un training y haci e cosnan debidamente y scucha di tur gremio nan puntonan.”
