Despues di un declaracion di Comerciantenan Uni den cual nan a señala cu nan no tabatin confianza mas den DIMP y nan maneho di impuesto, minister encarga cu Finanzas y Cultura, Xiomara Maduro a reacciona riba e declaracion aki riba su rednan social y ayera Comerciantenan Uni a contesta na minister Maduro mediante un conferencia di prensa.

Tabata dia 16 di augustus ora e corant local Diario a publica riba su frontpage cu “Comerciantenan Uni no tin confiansa mas den DIMP y nan maneho di nan impuesto,” un declaracion cu no a cay den bon tera cerca e minister encarga cu Finanzas, Xiomara Maduro, ken a pone un post riba su pagina di Facebook e mesun dia indicando:

“Djis imagina si e 215 empleado di DIMP mester tuma e atake aki na serio y no bay cumpra nada mas cerca e miembronan di CUA. Ta kico nan lo bisa e ora? Cu nan tin confiansa back den DIMP? Señores nos tur ta biba, traha y haci negoshi na Aruba. Nos tur ta conecta cu otro y mester di otro pa por biba na e pais aki. Tin hopi manera pa critica. Evita di transmiti of fomenta odio den comunidad cu boso critica. Laga nos tur corda cu e mundo ta rondo.”

Ayera, miembronan di Comerciantenan Uni, Frans Ponson y Francis Saladin a trece e punto aki dilanti den nan conferencia di prensa na unda nan a bisa cu nan kier aclaria y clarifica esaki. Francis Saladin a señala cu nan tin miembronan cu ta hiba nan preocupacion dilanti cerca nan. “Nos tin documentonan unda nos miembronan tin cinco aña ta wardando un contesta riba un bezwaar, unda esaki ta un golpi pa comerciantenan chikito, cu pa un comerciante grandi cu tin mas lomba pa wanta golpi y hala mas rosea. Ora un comerciante chikito bo no ta debolbe por ehemplo, cinco mil florin back, esaki ta duro. Ora nos ta haci un expresion ta pasobra e ta un preocupacion cu ta bin dilanti di nos miembronan. Awor e realidad ta cu nos tambe a wak cu Departamento di Impuesto tambe a saca un comunicado na unda cu nan ta papia di cu nan ta trahando riba e retraso y nos ta aplaudi esaki, pero ora nos ta trece algo dilanti e no ta un atake, y akinan mi ta reacciona unda cu minister di Finanzas ta papia como si fuera nos a ataca Departamento di Impuesto,” Saladin a señala.

Den su declaracion, el a puntra “acaso nos no mag di expresa nos preocupacion y nos no mag di expresa locual nos miembronan ta trece dilanti? Na unda cu nos tin rason y cu Departamento di Impuesto ta mustra cu nos tin rason, pero nan ta trahando pa soluciona esaki; pero bo ta haya un minister cu ta ataca nos personalmente,” el a bisa.

Igualmente Saladin a puntra minister Maduro si esey ta un menasa of si kier spanta nan door di e publicacion cu el a haci riba Facebook. “Pa mi esaki ta algo no aceptabel y no tolerabel. Mi ta kere nos tin libertad di expresa y a nos no ta bay acepta e tipo di atake aki di un minister y nos no ta bay tin miedo. Nos ta pidi na minister Maduro pa rectifica, pasobra esaki no ta tolerabel.”