E comerciantenan di San Nicolas tambe ta sinti e efectonan awor cu e proyecto di rehabilitacion di refineria a para. Specialmente esunnan cu a inverti den nan negoshi cu ta tene cuenta cu un apertura di e refineria.

Asina nos partner den noticia Ret Karibense ta informa.

Manera e negoshi Total Services. Nan a cumpra un edificio restaura aña pasa, cerca e entrada principal di e refineria. Den e edificio nan a habri un servicio di cambio (placa) y a construi apartamentonan. Esaki tabata traha specialmente pa empleadonan den mando di e refineria.
E inversion ta trata di un suma di 800 mil, segun director Ronald van Trigt. Awor cu Citgo a para e proyecto, e comerciante ta bisa cu nan mester cambia nan proyecto. “Nos ta keda cu e servicio di cambio pasobra e demanda den e bisindario aki ta keda. Pero e apartamentonan awor nos mester huur via AirBnB.”

Adapta
Yirman Pacheco tin dos negoshi cu tin di haber directo cu e refineria: un tienda unda nan ta bende sapato, helm y herment na contratista y tambe nan ta distribui gas likido.

E ta bisa cu e ultimo biahanan cu ya e refineria a cera su porta, cu ta tempo pa haci algo otro na e luga. Sinembargo sr. Pacheco a keda haci inversion grandi den entro otro su inventario momento cu atrobe nan a anuncia cu lo rehabilita e refineria. Te fin di 2017 e ta bisa no tabata mustra cu algo por a bay fout.

“Diripiente nan a manda contratistanan di e consorcio responsabel cas pa despues bin bek na maart. Pero awor cu nan a anuncia e stop di e proyecto, pa mi e ta un cuestion di keda warda. Mi no ta bay tuma un decision ainda, aunke mi ta pensa di cuminsa algo nobo den un otro direccion. Pero e ta un hecho: nos mester manda hende cas y baha nos gastonan pa por sobrevivi.”

Di otro banda e comerciante ta mira posibilidad nobo tambe ora ta dicidi cu lo desmantela e refineria. “E ora nan tambe mester di paña di siguridad y herment.”

Waf
Charles Brouns di e bar famoso Charlie’s Bar ta bisa: “Desde nan a cera Lago, diferente compania a habri e refineria bek y tur a bisa cu nan lo keda por lo menos un 25 aña. Pero esey nunca a pasa. Desde Lago a cera realmente nada a cambia. Ta tempo pa haci algo otro cu e luga.” Sr. Brouns ta bisa cu companianan mester adapta nan mes na e situacion y wak mas dilanti. E ta mira un miho futuro den e waf di e refineria cu ora e refineria mes ta cera definitivo, lo  para riba su mes.

“Na Zuid America tin solamente tres waf unda e tankernan grandi por drenta y pa motibo cu nan a amplia e canal di Panama. Na Noord America tambe tin solamente 3 waf cu por anda cu e tankernan grandi asina. Lo tuma por lo menos 20 aña prome cu tur otro paisnan lo a adapta nan infrastructura pa asina por tuma barconan grandi asina. E waf di nos refineria si por tuma nan y esunnan hasta mas grandi cu por bin despues. Y asina bo ta papia solamente di  uzo di  un cuarto di full di e tereno di e refineria.”