ORANJESTAD – E miembro di directiva di Camara di Comercio di Aruba (KvK), Randall Croes ta haya cu ta existi hopi posibilidad pa fortalece e lasonan comercial cu Haiti.
Actualmente e nivel di comercio entre Aruba y Haiti ta basta limita, e ta menos cu 100 mil florin pa volumen. E problema mas grandi ta e falta di logistica y transportacion di carga entre ambos pais. El a bisa cu Haiti tin alrededor di 14 miyon habitante y nan ta gosa di un infrastructura di produccion di productonan di alimento pa sostene e poblacion aki. Esaki a pesar cu e pais Caribeño aki a pasa den situacion socioeconomico dificil pa causa di temblor y inundacion cu a causa basta daño y morto.
Ademas nan tin industria masha moderno cu ta elabora producto di calidad y nan ta interesa di expande nan mercado. E ta haya cu na Haiti nos tin potencial pa haci negoshi bastante bon na Aruba cu productonan Haitiano di masha bon prijs compara cu China, India y otro paisnan for di unda nos ta hayando nos productonan. “Nan ta hopi entusiasma pa haci negoshi cu nos”, e ta bisa. Na november proximo lo bin un bishita di un mision comercial di Haiti pa Aruba.
Empresarionan na Haiti
Recientemente sr. Croes a biaha pa e isla aki pa atende un invitacion di Camara di Comercio Benelux-Haiti cu a organisa e evento “How to do business with Aruba”. El a laga sa cu e participacion y interes den e evento aki tabata grandi. E tabata un escenario ideal unda el a haci un presentacion extenso encuanto haci negoshi na Aruba. Tambe tabatin empresarionan potencial interesa pa haci exportacion pa Aruba. Nan ta fabrica diferente tipo alimento, souvenir, fruta, aquacultura, agro industria, industria di kimico, compania di aerolinea y tambe di cargo. Un compania aereo interesa pa crea e ruta pa Aruba ta Sunrise Air. E itinerario ta inclui Miami tambe of e ta vuelo directo tambe. Nan lo haci un estudio di mercadeo prome antes di cuminsa opera.
El a bisa cu idioma no ta un limitacion ya cu mayoria di e comerciantenan interesa sa Ingles di negoshi; y nan ta haci negoshi cu Merca. Nan ta bay pone tur e contactonan aki ariba e website di KvK. Sr. Croes a splica di tur e desaroyonan y diferente puntonan importante pa tene na cuenta na momento cu kier inicia actividadnan comercial cu Aruba. Igualmente tur esunnan invita tabatin oportunidad di conoce mas di cerca riba con e desaroyonan economico di Haiti ta den e ultimo tempo. Nan por a observa di cerca e progreso di Haiti despues di varios calamidad natural; y kico tur nan tin di ofrece y con por yega na haci negoshi entre Haiti y Aruba.
