Comerciantenan di Welcome Plaza a protesta dilanti di bestuurskantoor

Dialuna mainta, comerciante- y miembronan di Asociacion Welcome Plaza a tene un accion di protesta dilanti di bestuurskantoor, pa demostra nan digusto cu e situacion cu nan tin mas di cuater aña ta bibando na Welcome Plaza sin por yega na un solucion.

Lia Maldonado, miembro di directiva di Asociacion Welcome Plaza, a splica cu e comerciantenan t’ey un biaha mas dilanti bestuurskantoor pa wak si nan por haya un representante cu nan por sinta cune, cu lo por scucha nan, pa asina por fin yega na un areglo pa soluciona e situacion na Welcome Plaza.

E comerciantenan tin mas di cuater aña den e mesun situacion caba. Segun Maldonado a indica, nan tabata cerca di un acuerdo caminda nan a kere cu nan ta kedando cla, pero tur cos a bolbe cay na awa. “Awe nos ta bolbe manifesta cu mita di e comerciantenan di Welcome Plaza pa demostra nos malcontento cu nos no ta haya ni un persona pa scucha nos pa nos yega na un solucion pa e problematica cu tin”, el a bisa.

Nan disgusto ta pa motibo cu nan no ta haya niun representante di parti di Ministerio di Infrastructura – ya cu Welcome Plaza ta cay bao di DIP y DIP ta cay bao di Ministerio di Infrastructura – pero di parti di finanzas si tur hende a haya cobransa di henter aña 2021 y 2022.

E malcontento, Maldonado a remarca, ta cu nunca nan a keda cla cu e huur, nan no tin preto riba blanco kico nan mester paga durante e aña di pandemia, nan no tin areglo di e bañonan y tur locual nan tabatin desde e prome dia t’ey awe ainda, nada no a cambia pa e comerciantenan.

El a comenta cu aña pasa nan a bay bestuurskantoor y nan a haya un persona cu en realidad a scucha nan y nan a yega asina leu cu e persona aki, pero na momento cu nan a kere nan lo keda cla, gobierno a cay y despues di esey tur cos a bolbe cay den otro y nan a bay back na cero.

“Nos no ta hayando niun oido di nan parti. A manda diferente carta, pero te cu aworaki ainda no a ricibi ningun contesta ni di DIP ni di gobierno. Nos no ta hayando bishita di niun hende, tur cos ta mescos y tur nos peticionnan ta ainda den lachi”, el a remarca.

Un di e problemanan mas grandi cu e comerciantenan tin ta cu no tin baño na Welcome Plaza. Maldonado a conta cu siman pasa nan a haya un situacion hopi tristo, na unda un señora cu a baha for di barco cu tabatin mester di un baño a puntra tur hende rond pa un baño, pero lamentablemente e señora mester a bay te na e barco back, pasobra no tabatin baño disponibel.

El a sigui splica cu e baño di Welcome Plaza tabata traha prome cu e pandemia di COVID-19 a cuminsa, pero despues di pandemia, aparentemente e bañonan no tin awa ni coriente mas y nan no ta den uso. Y te ainda no a drecha nan tampoco.

Di otro banda, fuera di tur e retonan aki, aworaki e comerciantenan tin un agravante extra cu nan tin cu deal cune. Delincuentenan ta kibrando den e kiosconan anochi. Tin tres di e kiosconan cu a wordo kibra caba y mercancia a wordo horta, locual ta agrega un reto extra na e lista di problematicanan cu nan tin cu enfrenta.

Pa alivia e peso di e problema aki, aworaki tur e comerciantenan ta uniendo forsa pa paga un security pa cuida e luga anochi. Supuestamente security tabata den nan contract, cu ta bisa cu nan ta paga y haya tur e servicionan ey, pero nada di esey no ta e caso.

“Mi ta bisa, con ta posibel cu bo ta huur un luga y bo no tin acceso na un baño? Con ta posibel cu 2021 cu nos no tabatin barco, nos a keda cu barconan ta cuminsa september y e ora nos ta haya e cobransa di september, october, november y december di 2021, pero nos a haya e cobransa di e aña completo. Si nan no haya di ariba e opdracht, nan tampoco no por haci nada y dianan ta keda pasa, simannan ta bay, luna- y hasta añanan ta pasa. Si algo asina simpel no por wordo drecha, con ta para cu un problema grandi di berdad?”, Maldonado a enfatisa.

Elizabeth Guanipa, presidente di directiva di Asociacion Welcome Plaza, a splica tambe cu e asociacion no a tuma e caminda di abogado pasobra den un estado di derecho, caminda tur cos mester cana manera cu ta stipula, caminda tin un gobierno cu ta bisa cu hende ta central, un grupo di comerciante chikito y humilde manera nan no mester tin e necesidad di bay na un abogado pa haya oido di e gobernantenan.

For di aña 2018 caba caminda e comerciantenan ta manda carta pa tur hende, for di director di DIP, te Minister di Finanzas cu e asunto di cobransa di huur y Minister di Infrastructura, na unda nan a pasa den tres diferente Minister di Infrastructura y niun por a yuda nan.

“Esey ta e unico recurso cu hende tin awendia? Si no ta cu abogado bo no ta logra nada cu gobierno? Nos no kier yega eynan, p’esey nos ta hacie di e manera drechi, haci peticionnan formalmente. Varios biaha nos a bin na prensa. Tabatin biaha cu DIP a reacciona y nos a sinta cu nan y toch nunca bo no ta wak un resultado ta sali afo”, Guanipa a agrega.

Guanipa a subraya cu varios biaha nan a bisa diferente persona di Minister President su bureau y diferente hende di DIP pa bisa Minister President bishita Welcome Plaza pa e mes por wak kico ta pasando eynan. “Bin wak con e hendenan grandi cu ta baha di e barconan aki no tin caminda pa sinta, no tin caminda pa sconde di solo, no tin unda pa bay baño. Bin scucha for di nos pa nos splica bo kico nos kier”, el a remarca.

Na mesun momento el a enfatisa cu nan kier traha hunto cu gobierno y nan no kier djis pidi y bisa gobierno soluciona tur cos. E comerciantenan kier traha hunto cu gobierno pasobra, manera Guanipa a indica, di nan banda nan tambe tin hopi pa duna y nan ta dunando caba. “Si no ta pa nos, niun turista no ta haya informacion si tin WiFi, unda caya grandi ta, si e tram nan ta cobra p’e of no. Nos ta sirbi como embahadornan di turismo, e ora ey nos kier traha cu gobierno yega na un solucion pa tur e problemanan cu nos tin. Pero scucha nos”.

Guanipa a menciona tambe cu for di hopi tempo caba Minister di Turismo y APA a expresa nan interes pa tuma over Welcome Plaza. El a expresa cu nan no sa si esey ta e miho opcion y e ta sinti cu si DIP haci su trabao manera mester ta, tur cos por cana netjes. Pero el a remarca cu si ta cu un of cu e otro, un solucion nan kier. “Ta gobierno mester dicidi ken ta tuma e asunto over y por fin traha riba dje”.

E grupo di manifestantenan a opta pa no entrega un manifiesto pa motibo cu, segun Guanipa a splica, nan a yega di haci entrega di hopi peticion formal y a manda hopi email formal caba. Nan a bay manifesta cu nan voz pa demostra nan malcontento y alabes demostra cu nan kier atencion pa soluciona e problemanan cu tin na Welcome Plaza.