Desde cu e pandemia coronavirus a yega na tur pais, mayoria a wordo afecta no solamente den materia di salud, sino tambe den area economico. Aruba ta esunnan di mas afecta pa motibo cu turismo ta e area cu mas ta sostene economia di e pais, tanto pa comerciantenan grandi como esunnan mas chikito.
Desde 13 di maart, ora a anuncia e prome dos caso di COVID-19, Aruba cuminsa cera su fronteranan pa vuelonan for di Europa y dianan despues pa paisnan como Canada y Merca, loke a causa un caida indetenibel den su economia.
Comerciantenan chikito (eenmanszaak/Zzpers) a cuminsa preocupa, pa motibo cu algun di nan ta traha den area di turismo y ora tur cos a para, nan salario tambe a para.
Durante un entrevista cu un di nan, den cual Bon Dia Aruba lo laga su nomber anonimo, el a señala cu dianan ta pasa y nan no ta haya ningun atencion di kico lo pasa cu nan. Gobierno a presenta e programa FASE pa esunnan cu a wordo afecta pa via di situacion di COVID-19, pero te ainda nan ta sigui warda riba e ayudo aki.
Di mesun manera, el a splica cu algun di nan tin dos luna caba cu a registra, pero no a haya contesta. “E oficina ey tin un lista largo di iregularidad e incompetencia cu ta afectando e bida di hopi famia y economia mes”, el a sigura.
Dia 6 di mei, Bon Dia Aruba a haci un pregunta na Prome Minister, Evelyn Wever-Croes tocante cuanto tempo mas e hendenan cu a aplica pa FASE mester sigui warda, pa motibo cu hopi hende no tin cuminda na cas, a perde trabou y ta wardando un contesta precies pa loke ta trata e ayudo di 950 florin. Di esaki Wever-Croes a contesta cu e reaccion cu nan a haya pa e ayudo aki tabata un ‘abrumador’ y nan ‘no tabata prepara pa esaki’.
Gobierno a haci tur loke ta posibel pa paga miles di persona caba. Nan a amplia e cantidad di persona cu ta trahando riba e proyecto, pa motibo cu hopi hende a keha riba e maneho cu no ta uno optimal, pa por atende tur e hende cu a solicita e ayudo, Wever-Croes a enfatisa.
Asina mes, el a laga sa cu personanan cu a aplica pa e programa mester check riba website di FASE pa por haya nan number riba e lista di registro y eynan por verifica si nan peticion a wordo autorisa caba si of no.
Wever-Croes a sigura cu den dianan siguiente, despues di e conferencia di prensa, mester cuminsa haci e pagonan. Ademas el a comenta cu e lo pidi minister di Asuntonan Social y Labor, Glenbert Croes pa trece dilanti e ponencia aki den un conferencia di prensa, locual no a sucede.
E comerciante anonimo a referi cu nan no ta hayando contesta satisfactorio pa loke ta trata FASE. “Wever-Croes a priminti cu e minister concerni lo presenta pa duna cuenta, pero nunca e ta yega.”
Ademas, el a expresa cu tin hopi hende afecta cu no ta bin dilanti pa via di miedo cu lo boycott nan proceso. Tambe ta existi inconsistencia pa via cu helpdesk no ta atende e yamadanan, no ta duna informacion of asistencia pa alivia e sensacion di incertidumbre y frustracion cu e personanan aki tin.
E numbernan di registro ta aparece riba e lista como si nan a keda procesa caba y ta cla, pero e persona of negoshi no a ricibi e ayudo ainda.
Igualmente, el a trece dilanti cu nan no a anuncia oficialmente cuanto e Zzpers lo ricibi como ayudo, kiermen cu nan no sa si ta bay wordo paga como un trahado of como un negoshi. Algun persona ta ricibi e-mail indicando cu nan mester aplica di nobo y mester yena e formulario specifico di Zzpers y cu a bin como un rekisito adicional. E pregunta cu e tin ta : Pakico te awor nan ta bin cu un cambio? Y pakico tin mas exigencia cu pa negoshi mas grandi cu ya ser paga via SVB?
Tin otro di nan cu a wordo contacta via telefon pa entrega nan rekisitonan adicional y ta bisa cu nan no a yena e formulario nobo.
Y di e manera aki hopi preguntanan y incertidumbre tin rond e comerciantenan chikito cu pa cada dia nan ta sinti frustra y desespera pa motibo cu nan y nan famia ta pasando momentonan dificil wardando e ayudo aki.
