Comerciante Uni ta haci yamado pa bin cu solucion urgente pa situacion di debit y credit card fees

Ayera mainta Comerciante Uni Aruba (CUA) a tene un conferencia di prensa durante cual presidente di e organisacion, Frans Ponson, a trece pa dilanti un bes mas nan preocupacion pa e situacion cu ta andando relaciona cu e fee di debit y credit cards.

Ponson a recorda cu ya algun luna atras CUA a publica un video den cual e tempo ey a bisa cu tin un BBO nobo pa pueblo, pues ta trata cu e debit card maestro ta bay stop di funciona y e debit card na Aruba lo pasa over na bira un debit mastercard, cual ta trece cune tarifanan pa pueblo paga riba placa cu ta di e consumidor mes.

Ponson a remarca cu ningun comerciante kier subi prijs di nan productonan, pues tur kier competi den e mercado na un manera husto y e idea di bin cu credit card fee, hasta pa e debit card cu awor lo cambia bira debit mastercard, ta un problema cu meter busca un solucion p’e.

El a sigui splica cu CUA a trece dilanti e idea pa bin cu credit fee pa e credit card mes, y no pa e debit card cual ta e carchi cu e Arubiano ta usa na Aruba. Credit card fee lo bay e ora pa e turista, cu si ta usa credit card na Aruba y asina cubri e gastonan bancario cu ta in adicional aworaki.

Pero banco a bisa aworaki cu no por y cu niun comerciante, no mag cobra un turista e credit card fee aki na Aruba.

Pa demostra cu esaki algo“ridiculo” cu otro parti di mundo si ta existi credit card fee, Ponson a pidi algun persona, conocir, cu ta na Merca pa saca potret di recibo y avisonan tocante e uso di credit card y cobransa di credit card fee na Merca.

E potretnan ta mustra con comerciantenan na Merca ta pone aviso pa publica indicando cu ta acepta tur tipo di credit card, pero cu tin un fee pa usa e credit card. Algun ta indica cu tin un fee di 2.5% pa credit card, otro ta bisa 3% y tin ta no ta specifica cuanto, pero ta indica cu e maximo cu lo cobra pa usa credit card ta 4%.

El a resalta cu na Merca cobra un credit card fee ta usual. Tin otro establecimento cu ta hasta duna un prijs pa esnan cu usa credit card y un prijs diferente pa esnan cu ta paga cu placa cash.

Ponson a hasta menciona un ley cu a pasa na New York cu ta indica cu no solamente semper a cobra credit card fee, pero aworaki e comerciante mester bisa e cliente kico e ta cobrele y no por sconde e cobransa mas. Den e mesun ley aki tambe na final ta bisa cu e ley nobo aki no aplicabel pa debit card.

E situacion ta diferente na Aruba. El a enfatisa cu na Aruba no e comerciante no mag di cobra e credit card fee aworaki, pero door cu gobierno no a regla e ley aki, e tarifa cu ta cobra e debit card di e pueblo a bira casi mesun tarifa cu e credit card. “Kiermen nos no por ni cobra e credit card na e turista, pero nos debit prijs, door cu na Aruba no a proteha e consumidor, a bira casi mescos cu credit card,” Ponson a subraya.

El a indica cu ta importante pa Comerciante Uni sinta cu banconan, e Asociacion di Banconan y sinta cu gobierno hopi lihe pa bin cu un solucion pa e situacion aki.

“Si no bin cu un solucion,comerciante ta haya nos ta hink’e den e prijs. Hincando den e prijs esey kiermen cu si hinca e banking fee den e prijs, tin un otro 7.5% di BBO cu tin cu bin riba dje tambe cu mester pas’e pa e consumidor,” el a resalta.

Ponson a splica cu gobierno ta simplemente wak e prijs total di esey y e comerciante tin cu paga e BBO. Ademas, el a sigui splica, cu gobierno a pone comerciantenan sconde e 7.5% di BBO den prijs y awor banco kier pone e fee pero no ta laga e comerciante pone banking charge pasobra ta bisa cu no mag di pone, si no ta kita e mashin di banco. Ta pidi e comerciante atrobe pa sconde e tarifa den prijs, pero el a destaca cu si scondi’e den e prijs mester agrega otro 7% di BBO riba dje.

El a agrega cu banco a indica cu por yama e tarifa con nan kier, pero no mag yam’e banking fee y no mag di cobra turista un credit card fee. Cual Ponson a destaca ta laga e comerciante mustra malo pasobra ta manera cu ta di nan mes nan ta cobrando e tarifa y ta aumenta e prijs.

Ponson a indica cu ya CUA a yega na e punto cu ta bay pidi conseho legal di nan conseheronan pa wak si loke ta pasando ta legal, si esey mag.

El a remarca cu CUA ta spera cu e gobierno nobo por reuni hopi lihe riba e situacion aki pasobra si no tur comerciante na Aruba ta bay pone e tarifa den e prijs y ta bay bin atrobe un aumento substancial.

“Gobierno tin cu atende cu e cos ki lihe pasobra si no ta bay bin un aumento den prijs. Un subida substancial pa pueblo,” el a enfatisa.