Frans Ponson, miembro di Comerciante Uni ta sostene e mocion di Daphne Lejuez pa aclaria e situacion cu BBO riba recibo prome cu Parlamento aproba e ley nobo. E ta haya cu ta malinformando pueblo ora ta bisa cu no ta pueblo, sino comerciante cu tin cu paga BBO. Segun e comerciante ‘na tur pais ta consumido ta paga belasting indirecto riba ganashi. E ta hinca den prijs mescos tur otro cos’.

Pa prome, Ponson ta aclaria cu Comerciante Uni no tin ningun color politico y cu comerciante no tabatin problema cu e ley di paga belasting for di 1 januari 2007. Sinembargo, ‘hende ta puntra pakico nos a bin dilanti awo’.

Problema a cuminsa ora gobierno a bisa cu no ta pueblo tin cu paga BBO. El a splica cu ora a cuminsa cu BBO no tabatin probema cu esey. Gobierno actual tampoco tabatin problema. Sinembargo, ‘e problema a bin ora cu gobierno mes a informa pueblo cu no ta boso mester, paga sino e comerciante’.

For di eynan, Ponson ta bisa cu e discusion mas grandi a drenta. E ta splica cu asunto di kita BBO di factura ta un problema pa comercio. E ta aclaria cu tin 2 tipo di impuesto, directo y indirecto. “E belasting indirecto ta ora gobierno ta bisa comercio cu di tanto ganashi tin cu paga tanto placa. E loonbelasting di tur trahado ta paga na gobierno directo.”

Pa locual ta BBO, sales tax, IVA tur ta belasting indirecto. Esey ta nifica cu ta cobra e consumido (cu ta pueblo) y tin cu duna placa. Na tur otro belasting sea BTW di Hulanda, IVA di Latino America un impuesto cu consumidor tin cu paga indirecto.

E mesun ley cu a lansa den 2007 ta bisa cu consumidor indirectamente ta paga impuesto, maske comerciante ta paga belasting na gobierno: ‘Na tur pais ta e consumidor ta paga’.

BBO, mescos tur otro gasto, ta inclui den prijs
Segun Ponson ta mal informaciondo pueblo. “Tur locual mi tin cu paga pa drecha, mecanico, loonbelasting, tur esey mi tin cu kita prome cu mi yega na mi ganashi. E mesun BBO cu mi kita di pueblo mi mester duna gobierno. Nan ta malintepreta y trece confusion cu ta kite for di nos ganashi.”

E ta continua splica cu e confusion cu tin ta cu kier kita BBO for di recibo y tira e peso riba comercio, cual nan ta percibi ta haciendo abuso riba e prijs. E preocupacion segun Ponson ta cu prijs ta bay subi. “Tur ta bay keda cobra y prijs lo keda subi, cual no ta combini ami como consumidor tampoco.”

Mandatario no ta contesta carta
Ponson a bisa cu a manda carta pa Ministro di Finanza, pero no a haya contesta. Segun e ta bisa, no ta Comerciante Uni so, pero varios asocacion conhuntamente ta manda e mandatario carta, pero no ta haya reaccion.

“Un pilar economico nos tin: Turismo. Mester tin siguransa corecto pa reforma fiscal corecto. Nos ta sostene Parlamentario Daphne, kende ta propone amienda pa para e ley tanten no tin claridad pa tur hende”, Ponson a expresa.