Comerciante Frank Tieleman, kende a yega di forma parti di directiva di e ex-asociacion di comerciantenan di caya grandi conoci como MAMBO, a vocifera su preocupacion riba e caida di actividad comercial den centro di ciudad.

E ta haya cu e comerciante a bolbe haya un golpi duro cu e crisis di e pandemia di Covid-19 a trece cune pa mundo henter, y Aruba no ta un excepcion. Pero no solamente e comerciantenan den caya, sino cu e ta un golpi duro pa negoshinan den general na Aruba.

E ta haya cu caya principal a haya un dobel golpi, ya cu e comerciantenan tabata den situacion dificil caba. Y awor e situacion dificil di e crisis di Covid, nan a bay na cero actividad economico. Di un banda -segun Tieleman- tur hende ta compronde e riesgonan di e Covid-19. E medidanan, entre otro cu comercio considera no esencial mester a cera, tabata necesario. Pero e ta haya cu tin un balansa, caminda nos tin cu yega evalua cu si tur negoshi, no solo caya, ta sinti nan mes asina preta cu no por habri mas, e ora ey nos ta confronta otro problema di un magnitud grandi tambe.

“E balans ey ta dificil. Pero mi ta haya cu nan ta haciendo un bon trabao cu poco poco pa medio di fasenan bo ta habri bek.”

Pero e ta haya cu di otro banda, pueblo mester por cuminsa participa den economia local cu ta habriendo. Pasobra esaki ta e motibo cu a cuminsa habri pa economia local cuminsa draai, ya cu actualmente Aruba ta safe contra e virus. Pero si e consumido no ta cumpra, basicamente nos ta den e mesun posicion. “Bo no ta pickup loke bo kier pickup tampoco.”

Sinembargo, den tempo y menos bon, comerciante Frank Tieleman semper a pone su confiansa riba caya grandi. Ainda e ta sigui pusta riba recuperacion comercial di e area clave aki situa den pleno curason di Oranjestad. Pero actualmente actividad den caya ta hopi minimo.

E dia cu comercio den caya por a habri, nan por a mira cierto actividad, durante un par di dia siman pasa. Pero despues el a cay atrobe. Pero e ta haya cu mester evalua e circunstancia actual, ya cu hopi hende no tin entrada. E fin di luna aki ainda algun hende ta bay cobra algo. Pero como comerciante, nan expectativa no ta halto den e situacion actual cu nos ta pasando aden. Pasobra seguramente esun cu ta cobra ta gasta nan placa riba cierto prioridad, y no riba cierto mercancia considera como luho.

A pesar di e panorama aki e comerciante Tieleman ta mantene su mes positivo. Te hasta e tin algun proyecto den mente cu lo kier bira realidad den futuro. E situacion cu nos ta confronta no ta uno facil, pero e tin speransa cu poco poco nos ta sali dilanti, y cu economia ta bay reactiva keto bay.

“E pueblo mester tin e confiansa cu e comercio ta duna nan parti di tene na mes na regla. Tin e programa di certificacion di ATA cu nos mes a participa.” Tur esaki ta yuda pa mustra tur hende cu e sector comercio ta traha safe, y cu e cliente of consumido por sinti nan mes safe tambe.