11juliNP Comerciante (1).jpg

 

ORANJESTAD – Tita Peña di Friends of God Bookstore a conta cu e tienda tin 8 aña locual cu kiermen cu nan a pasa den tur e diferente momentonan di caya grandi. Prome ora cu auto por a pasa, ora a cuminsa cu construccion cu a cera tur camindanan y despues, cu awo tram ta pasa y cu a introduci Aruparking. Friends of God Bookstore mes ta situa patras di caya grandi, un area cu ainda auto por pasa dilanti (entre Radioshack cu Checkpoint), pero ta den zona di Aruparking.

Bon Dia Aruba a puntra Sra. Peña con a bay cu e tienda den tur e proceso aki teniendo na cuenta cu practicamente tur tienda ta indica cu nan benta a baha. El a splica: “Como comerciante nos a pasa door di tur e up’s and down’s di construccion y/of remodelacion di caya grandi, no solamente Aruparking pero tambe e tram.” El a sigui splica cu di berdad e sistema di parkeer cu a wordo introduci por medio di Aruparking ta uno cu a dal e tienda hopi fuerte den e sentido cu mester a cuminsa adapta y siña e clientenan pa haci uzo di un sistema cu ta completamente nobo na Aruba y cu hopi hende no ta custuma di uza. “Berdad e tabata un proceso dificil y un proceso decisivo caminda cu bo ta dicidi di continua of cera.” Sinembargo Sra. Peña a opina cu e ta kere cu e pasion pa locual cu bo ta haci, sigui cu e input di cada comerciante y pa sigui kere den locual cu bo ta haci ta locual cu a mantene e portanan di e tienda habri. Locual cu Friends of God Bookstore a haci e tempo ey pa purba mantene cliente, ta cu pa cada tanto placa cu nan gasta den e tienda, Friends of God Bookstore ta paga nan ticket pa parkeer, tabata debi ta for di su factura e consumo di e parkeer. Asina a continua y a sigui den e boto te cu clientenan a cuminsa custuma. “Na cuminsamento e tabata un proceso hopi, hopi fuerte,” Sra. Peña a comenta.

 

A puntra Sra. Peña si e ta opina cu locual cu Aruparking ta haciendo colaborando cu caya grandi manera e campaña cu tin actualmente, ta yuda cu e situacion. Segun Sra. Peña e ta contento cu Aruparking a bin cu e campaña aki y ta kere cu e ta un porta pa sigui cu diferente otro y diferente sorto di actividad y proyectonan pa e comerciantenan por cuminsa kere atrobe den nos caya grandi y no laga muri e comercio den e caya principal.

“No solamente pa nos hendenan local pero tambe pa nos turistanan, cu e sistema di tram ta ripara cu hopi turista ta yega te na final di caya y si nan ta wak un ghost town, no ta bay tin e input pa nan bay haci compras. Pero di otro banda si nan ta wak cu hendenan local ta akibanda, nan lo bisa cu nan tambe kier shop eynan y bay te na final di caya y conoce e otro parti y pues e final di comercio.” El a enfatisa cu e ta kere den e proyecto y ta spera cu por sigui cu mas iniciativa.
Den caya grandi tin hopi tienda cu ta mesun cos den e sentido cu tin hopi tienda cu ta bende paña. Si mira e producto cu Friends of god Bookstore ta ofrece, ta ripara cu esaki ta diferente for di cualkier otro, sigur den caya grandi. Pero tambe cu e producto cu nan ta ofrece ta varia. Prome impresion di redactor di Bon Dia Aruba cual tabata su prome biaha den e tienda ta, cu e nomber di e tienda a duna e impresion cu e tienda cu lo articulonan y bukinan hopi spiritual ta bende. Esaki berdad tabata e caso, pero no ta esey so, cual ta haci cu cualkier persona buscando un regalo pa un ser keri por drenta y sali cu algo. Tumando esaki na cuenta a puntra Sra. Peña si e ta kere cu esaki a yuda tene e portanan di su negoshi habri, mientras cu hopi segun camara di comercio tin hopi tienda cu a cera nan portanan y cu e situacion cada dia ta bira mas pio pa algun.
Sra. Peña ta comparti e opinion cu nan ta practicamente den e unico giftshop nan den caya grandi. Tin diferente Boekhandel si, pero definitivamente e producto cu Friends of God ta ofrece ta diferente y p’esey ta sigui kere  den locual cu e tienda ta y den comunidad. “Kisas berdad si nos tabata un tienda di bende paña, acesorio of sapato e lo a bira hopi mas dificil pa continua. P’esey un biaha mas mi ta yama danki na cada un comerciante cu a kere den nos caya principal y den nos pais, sin importa nos sistema y gobierno etc. Di mes Friends of God lo keda existi pa sirbi caya grandi y comunidad.” Sra. Peña a termina bisando.