Ariba rednan social, varios usuario a comenta ariba e hecho cu nan a mira algun mayor iresponsabel ta bay cu nan yiunan chikito na paradanan cu no ta pa mucha, entre otro Jouvert Morning.
Ariba e red social Facebook, varios persona a publica tocante algun situacion lamentable cu ta envolve mayornan iresponsabel cu ta bay cu nan yiunan chikito paradanan cu no ta di mucha. Diabierna manece diasabra a tuma luga e famoso Jouvert Morning y algun persona a publica cu nan wak algun mayor cu muchanan chikito, hasta baby, na e popular evento aki.
“Hopi erg. Ami ta haya niun parada grandi bo mester bay cu baby chikito. Con bo tin curason pa haci algo asina? Increibel,” un usuario a comenta.
“Anto ora algo bay robes, TUR HENDE POR YUDA, excepto nan mes como mayor! Y hera nan tin e descaro pa culpa cu ta otro ta haci abuso di mucha cu nan yiu, sin wak nan mes prome,” otro usuario a indica.
“Amor pa jouve ta mas grandi cu amor pa nan propio yiu” ; “Ami ta haya si wak un mayor cu un baby na carnaval un boet 1000 fls bay ariba” ; “Esey ta otro forma di abuso di mucha,” ta algun di e otro comentarionan ariba e tema aki.
Esaki ta un tema cu tur temporada di carnaval ta bin pa dilanti y ta capta atencion, pasobra despues di tanto aña y tur e informacion ariba cuido di mucha, ainda tin mayor cu ta haci esaki.
Prome cu temporada di carnaval cuminsa, hopi fundacion dedica na cuido di mucha ta haci diferente campaña, ta publica contenido y ta hasta parti bukinan informativo na publico y na scolnan pa conscientisa mayornan ariba e tema di cuido di mucha durante e temporada di carnaval.
Ta lamentable cu ainda, a pesar di tur e esfuersonan aki, tin mayornan cu ta hiba nan yiunan chikito na paradanan di adulto y pone nan den un cantidad di peliger.
