Varios comentario redaccion di Bon Dia Aruba a haya riba nos articulo cu a expone e cambionan cu ministro encarga cu enseñansa ta introduciendo pa Colegio San Nicolas. Nos no ta desea di bay discuti y compara opinion, sino mas bien kier dedica atencion na algun aspecto treci na nos atencion, cu ta tira un luz mas fuerte riba e asunto.
Un scol di Havo/Vwo den e area mas empobreci di Aruba tin su particularidadnan pa tene na cuenta. Esaki ta por ehemplo cu, segun un fuente di confianza, tin un diferencia grandi entre e contribucion di mayor na De Schakel, pero tambe cu Colegio Arubano. Ta un gran pregunta kico ta bay pasa cu e alumnonan cu no tin e poder financiero pa cumpli cu ningun exigencia di contribucion mas aleu di loke tin actualmente. Aki tin pregunta cu mester contesta, pasobra un scol publico en principio ta hustamente e ‘vangnet’ pa alumno cu tin problema pa paga un scol priva. Cu e move aki, en todo caso a elimina e scol publico.
Resultado di examen.
E argumento mayor pa pasa e scol pa De Schakel ta pa mehora e resultadonan final, cu no ta bon. De Schakel ta logra un resultado di riba 90%, pero cu un grupo selecto y chikito, di mucha di famia cu por paga e 10.000 florin pa aña, pa haya un acompañamento bastante intensivo y individual. Otro cos ta pa opera un scol cu mas di 100 mucha cu ta bay examen, anto den e condicionnan den cual e scol mester traha. De Schakel por tuma e scol over, pero ta inimaginable, segun nos fuentenan, pa ripiti exito cu un grupo mas grandi, cu tin ademas un background completamente diferente na e publico cu ta asisti na De Schakel.
Tambe mester tuma na cuenta cu den e resultadonan di Colegio San Nicolas no tin un speracion di e resultadonan di esnan cu ta bay Havo/Vwo den dia y e otronan cu ta riba un trayecto mas largo. Segun un experto di e materia aki, si separa e resultadonan aki y compara e alumnonan cu ta bay dagopleiding, e resultadonan no ta mas malo cu esunnan di Colegio Arubano. Lo ta interesante pa mira e cifranan aki ordena di manera obhetivo, pa mira si esaki ta berdad.
En todo caso, nos tin informacion cu diabierna awor e ministro encarga cu enseñansa lo tin un encuentro cu e Comision di Enseñansa di Staten. Ta di spera cu nos parlamentarionan lo haci nan trabao di control.
