7Salud (2).jpg

Edad cu muchanan ta bay scol ta e momento perfecto pa siña tocante comemento saludabel y actividad fisico. Esaki ta e momento cu muchanan tin un schedule mas druk tin ‘zakgeld y ta cuminsa forma nan mesun estilo di bida. Muchanan ta siña hopi lihe den e temponan aki y ta wordo influencia hopi pa nan amistadnan y locual ta mas na moda.

Pa un mucha ta saludabel e ta importante pa e come varia y bon balansa. E cantidad di actividad fisico cu e ta haci tambe ta importante pa determina cuanto nan mester come. Ora mucha ta druk, ta importante pa nan ‘snack’ regularmente y bebe hopi awa. Prome cu muchanan sali cas percura cu nan ta desayuna, come na scol y net despues di scol, ta momentonan importante pa muchanan come. Como gewichtsconsulent, mi kier a trece algun ‘healthy tips’ pa mayornan percura cu e muchanan ta come bon.

Mi a puntra algun mayor kico nan yiunan ta bay scol cu ne y reaccionnan cu mi a ricibi no necesariamente ta e miho opcionnan. Arepa traha na cas, pan blanco cu beleg, paki juice manera Caprisun of Kool-aid. Ora no tin nada pa prepara na cas, mayornan ta cumpra pastechi y malta o chubby. Pa loke ta muchanan cu ta na edad cu por maneha placa, e responsabilidad ta cay riba nan pa dicidi kico nan ta cumpra cu 5 florin den cantina na scol. Aki muchanan na algun ocasion ta opta pa cumpra mangel pa come, en bes di un pan. No ta tur scol na Aruba ta promove comemento saludabel, pues mayornan mester ta responsabel cu e muchanan ta alimenta bon.

Bon desayuno

Desayuno despues di un bon soño anochi ta importante pa percura cu e mucha ta concentra bon na scol y ta keda activo. Ta un ehempel pa bo yiu y sinta come un breakfast hunto cu ne.

·      Un conchi di cereal sin sucu y lechi abou na vet, compaña cu un fruta ta un bon opcion pa henter famia.

·      Papa volkoren

·      Pan volkoren cu tuna, keshi abou na vet p.e Mozzarella (evita ham, salami etc. cu ta hopi salo)

·      Smoothie/batido natural. (Bacoba ta hopi zoet y pues ta duna hopi sabor na cualkier smoothie sin cu mester benta sucu. Por combina fruta cu berdura den un smoothie facil.

·      Webo herbi/ (hasa cu Pam spray)

Mainta por bebe banda di e desayuno: awa, te, juice 100% natural

E opcionnan aki ta halto na fibra, proteina, vitamina y mineralnan abou na vet, sucu y salo, cual ta haci nan saludabel.

Pastechi, kroket, loempia, coca cola, malta, refresco, juice nectar, pan blanco, cereal zoet etc. Ta opcionnan sea yena cu vet satura malo, sucu, salo cual ta hisa e riesgo pa malesanan relaciona cu sobre peso, manera diabetes tipo 2. Ta bon pa mayornan corda cu diabetes tipo 2 no ta un malesa di hende grandi so, muchanan hopi hoben a wordo diagnostica cu e condicion aki. E ta algo tristo y mayornan mester tuma e salud di nan yiunan na serio como e ta afecta e calidad di bida di e mucha.

‘Lunch’ na scol

Mayoria scol tin un cantina cu ta ofrece un variedad di cosnan pa come. Hopi biaha e cumindanan aki ta mas caro cu si como mayor a dedica algun minuut na prepara algo pa e mucha. Mas importante cu e costo, kisas e mucha por come algo cu mas nutriente si e ta prepara na cas.

Algun sugerencia:

·      Pan volkoren traha cu keshi abou na vet, tuna, salada, webo, pindakaas (abou na sucu)

·      Diferente fruta corta

·      Berdura corta

·      Yoghurt

·      Juice abou na sucu, awa preferibel , lechi abou na vet/sin vet

Evita di uza salami, ham etc. den nan pan, cual ta yen salo y ta procesa, chips, buscuchi zoet, rice krispies, mangel, snacks hasa den vet etc.

E presion pa muchanan como locual ta mas na moda na scol ta fuerte, pues lag’e come esakinan ocasionalmente, manera ora muchanan haci aña y nan treat, evento special etc. Tambe ta bon pa limita e placa cu ta duna mucha pa uza na scol. Comiendo un mangel, lollipop, saco di chips etc ocasionalmente, mundo no ta caba. Sinembargo si nan come esakinan mucho frecuente lo haya cu muchanan no ta haya suficiente nutriente, muchanan ta subi di peso y bira obeso, ta gasta hopi placa y segun nan ta crece bo ta perde e oportunidad pa siña  bo muchanan pa come saludabel.

Wak e imagennan pa inspiracion y haci e cambio den bo yiu su lunch box pa aña escolar nobo