Diabierna 2 y diasabra 3 di september Cas di Cultura tabata full sold out cu su comedia skirbi, produci y dirigi pa Faritah Luidens “Amiganan pa semper”.
E obra teatral di Luidens cu ta un personahe conoci den mundo di arte y teatro na Aruba a causa sensacion e fin di siman ultimo unda e dos funcion a keda sold out, loke ta nifica cu teatro na Aruba ainda tin su relevancia.
Un presentacion unico den man di diferente actriz, actornan y hasta e debut di Edjean Semeleer den mundo di teatro e cual cu su participacion interpretando “Jorge” conhuntamente cu Amy Longott-Richards, Lilian Pieters-Malmberg, Faridi Daou, Meredith Rafael, Nilka Franka, Isfael Luidens y Jason Croes a causa den e publico presente den e dos dia ey hopi harimento unda idioma no tabata un barera pa nan cu tambe a logra di expresa nan habilidad pa papia Spaño.
Tocante e obra, e ultimo deseo di e mama di Sofia tabata pa nan strooi su shinishi na e pais na unda e la nace. Hunto cu su 4 amiga, Sofia ta dicidi pa cumpli cu e deseo di su mama y ta sali di biahe rumbo pa Colombia. E biahe cu na prome instante ta mustra di bira uno placentero, no a bay manera plania y e amiganan a haya nan mes confronta cu diferente reto cu ta test nan amistad y tambe nan curashi.
Pabien na su organisadonan, actornan y personahenan envolvi pa sigui promove cultura y teatro na Aruba.
Potretnan cortesia di Jhon Freddy Tobon Montoya.
