Ayera mainta e studiantenan di John Wesley College di San Nicolas y Mon Plaisir College di Playa a pasa den un experiencia inolvidabel den cuadro apertura di e 6 Green Education Symposium, ora cu algun di nan a come insecto of criki.
Esaki pa motibo di e tema di ‘pa cambio di clima cuminda y agricultura mester cambia tambe’ (Climate is changing food and agriculture must too) e aña aki. E simposio ta tuma luga henter e siman aki na Biblioteca Nacional Aruba y ta concentra riba scolnan secundario y educacion avansa.
Durante e evento educativo aki nan a incorpora pa prome biaha un tayer di arte sostenibel cu material recicla, entre otro. Tambe nan tin un tour den e cunucunan sostenibel, nan ta Cunucu Speransa Nobo na Alto Vista y tambe na departamento di Santa Rosa na Piedra Plat.
Nan tin un grupo di oradonan profesional tanto internacional como local, entre nan: David Bynoe (Banbados), William Michaels Guerrero (Colombia), Kristen Mastel (Merca) y e oranan local Frank, Kelly, James Ocalia, Andres Marin y Byor Lampe.
Un anochi di lectura
Ronny Alder kende ta e coordinador di e simposio a invita publico den general pa asisti na nan Evening of Lectures cu ta tuma luga mañan for di 7or pa 9or anochi biblioteca su sede principal na Playa. E nochi lectura aki ta un chens pa tur hende interesa riba e topico di cambio di clima y agricultura sostenibel por haya chens pa atende e charla di e oradonan internacional. E ta completamente gratis.
Aruba como un isla di Caribe mester pone atencion na cambio di clima y nos mester keda mantene actualisa rond di e topico aki. E cambio den nos clima ta algo cu ta tuma luga rond mundo y Caribe no ta excepcion, sr. Alder ta splica.
El a referi na e fenomeno Irma cu ta pasando den Caribe actualmente cu ta un yamada di atencion pa nos ta prepara pa cualkier eventualidad. Pa asunto di agricultura e ta haya cu e tendencia di awendia ta come saludabel cuminda di bo mesun tera pa stimula bo economia sostenibel.
Scarsedad di cuminda
E simposio aki ta wordo organisa conhuntamente cu departamento di Santa Rosa y sponsor pa WEB den cuadro di su 85 aña di existencia. Director di Santa Rosa, Natale Maduro ta bisa cu pa nan esaki ta un di nan proyectonan relevante ya cu nan ta bin den contacto cu un grupo importante cu ta studiantenan di Aruba.
Mediante e simposio di Green Education e prome grupo di studiante a haya diferente topico interesante. Segun sra. Maduro, considerando cu e hobennan aki ta bay carga nos economia den futuro, nan mester ta consciente riba importancia di e sector primario. Tambe con nan ta aporta pa haci’e di un manera sostenibel pa e por tin e balans y evita efecto negativo den futuro.
Ta bon pa tene cuenta cu mundialmente scarsedad di cuminda ta keda un problema y cu nos ta importa hopi di nos cuminda diario. Pa ta exacto 99% nos ta importa, sra. Maduro ta bisa. “Si nos wak cu e cambionan di clima ta trece cu ne, e ta pone nos pais den un posicion hopi vulnerabel como isla. No solo nos comunidad ta depende di cuminda importa pero tambe e parti di nos turismo cu ta nos pilar economico.”
Vocero di WEB, Asja Dodgen a bisa cu e compania di utilidad aki den e ultimo añanan a pasa den diferente cambio, mayoria di nan ta desaroyo riba tereno di sostenibilidad. P’esey e ta haya cu e prome seccion di e simposio aki tabata basta varia poniendo atencion den aspecto di conscientisacion di nos hobennan.
