Ayera mainta Procurador General Bote Ter Stege a sali di un di e consultanan cu stakeholders cu formador Evelyn Wever-Croes ta hibando e ultimo simannan, unda a combersa tocante entre otro independencia di Ministerio Publico (OM) y reforsamento di capacidad pa investiga casonan di corupcion na Landsrecherche. Den conferencia PG a indica cu capacidad limita pa investiga casonan di corupcion y tambe ambiental ta haci cu investigacionnan ta tuma largo.
PG Ter Stege a sali for di e consulta cu formador di Gabinete Wever-Croes II bisando cu desde cu el a cuminsa eherce su funcion, el a wordo pidi pa pone OM na mas distancia di gobierno compara cu e distancia cu ta existi actualmente. El a enfatisa cu OM ta independiente, y ta tuma su propio decisionnan fuera di influencia politico. Ter Stege a splica cu entre otro ta salvaguardia esaki por medio di e evaluacion di un hues den casonan. “OM no por dicidi riba su mes si un hende ta bay cera, e decision y evaluacion final ta cay pa hues”, PG a bisa den e conferencia di prensa.
E unico manera cu por tin influencia politico riba OM, ta si minister di husticia duna opdracht na OM. Pero Ter Stege a indica cu si haci esaki, e minister mester pone e opdracht riba papel y manda esaki na parlamento pa evalua. “Esaki ta algo cu ta regla den constitucion di Aruba”, PG a indica.
Procurador General a refleha riba e imagen cu por surgi di un OM dependiente di gobierno posibelmente pa via cu OM ta depende riba gobierno pa haya personal nobo. “E imagen ey nos kier traha riba dje. Esey tabata nos proposicion cerca e gobierno anterior y cu e gobierno aki esey tambe ta wordo tuma man habri. Kiermen tur hende ta di acuerdo cu otro.” E manera cu lo bay regla esaki den futuro, ta cu e proceso pa busca candidato lo bay via e canalnan normal pa busca un ambtenaar pa yena un posicion, pero en bes cu e minister di husticia of otro director di departamento ta tuma e decision pa tuma e persona, e decision aki lo resorta bou PG.
“Dus nos lo bay percura cu mescos cu miembronan di Raad van Advies y trahadonan di Parlamento pa OM ta mas na distancia di gobierno pa loke ta trata cumpramento di material y buscamento di personal.”
‘Man yen cu casonan di corupcion’
Actualmente tin un cantidad di caso cu ta pendiente: Avestruz, Flamingo y mas. PG a bisa den e conferencia di prensa cu nan ta nan best pa laga e casonan wordo caba bon. “Pero nos mannan ta yen actualmente. Nos ta haci esaki den e ritmo cu nos ta haya responsabel”, PG a expresa.
OM mester investiga corupcion cu e recursonan limita cu tin disponibel riba e isla. Ora ta trata di politiconan y ambtenaarnan, e tarea ey ta primeramente di Landsrecherche. PG a bisa cu e ultimo minister di husticia a pidi pa expande Landsrecherche, ‘pero aworaki e Landsrecherche ta consisti di solamente 12 hende’. “Un investigacion penal ta envolve hopi cos. Mester analisa ley, mester tuma denuncia, tende testigonan, tende nan atrobe, eseynan ta trayectonan cu ta tuma hopi tempo. No solamente esey, pero e trabou mester ta hopi preciso y bon. Y esey ta tuma su tempo.”
Banda di Landsrecherche, tambe tin e posibilidad pa haci un apelacion riba e Recherche Samenwerkingsteam (RST). RST ta un colaboracion entre e paisnan den Reino pa investiga entre otro corupcion. “Pero no t’asina cu por djis yama e recherchenan aki pa yega den avion den un par di dia, pasobra nan ya ta ocupa cu otro investigacionnan. Pues e ta un trayecto precario, pero cu e expansion di Landsrecherche y e apoyo di parti di RST, tin suficiente recurso pa investiga casonan cu lo por presenta den futuro.”
‘Casonan di medio ambiente dificil pa persigui pa via di falta di ley y capacidad limita pa investiga’
Tocante casonan ambiental, PG ta cuestiona si tin legislacion y reglanan suficiente encuanto medio ambiente. PG ta haya cu no tin suficiente. Eynan Ter Stege ta haya cu tin un reto pa e gobierno nobo. Sinembargo PG no ta haya cu derecho penal ta e solucion pa problema ambiental. A base di e leynan actual, OM por tuma decision pa persigui un persona penalmente den cuadro di medio ambiente. Pero esey ta tuma su tempo, pa OM por tuma un decision bon. Na fin di dia e decision mester ta uno bon, Ter Stege a bisa. Si OM tuma e decision pa cuminsa un investigacion penal, e ora ey e ta bira un reto pasobra no tin casi capacidad pa investiga infraccionnan relaciona cu medio ambiente.
‘OM mester ta mas transparente cu ta posibel, pero tin cosnan cu nos no por bisa’
Encuanto libertad di prensa, cual ta algo cu tabata bou poco presion durante e pandemia di Covid, PG ta haya cu prensa mester haci su trabou. Ter Stege ta haya cu OM mester ta mas transparente cu ta posibel, pero na mes momento tin cierto cosnan cu OM no por bisa nada tocante nan. “Tocante hende nos no ta bisa nada. Nos ta haya cu e privacidad di sospechosonan mester wordo protegi mas. Si hende di prensa haci esey, esey ta nan responsabilidad.”
“Prensa mester haci e trabou cu nan t’ey pa haci. Mi no tin un opinion mas tocante esey. Prensa segun mi mag skirbi loke nan kier, y esey nan ta haci. Claro tin biaha esey no ta leuk pasobra bo ta wordo acusa cu bo tin un relacion cu prome minister. Esey no tin nada di ber cu periodismo, esey tin di ber cu ‘bashing’. Pero mas importante, prensa mag di haci loke nan ta haya bon. E PG aki por lidia cu un boks aki aya. Mescos cu mi ta haya cu prensa tambe mester por contra un boks aki aya. Nos mester tene otro skerpi y haci e trabou cu nos t’ey pa haci.”
