Despues cu e opcion ‘NO’ a gana den e plebiscito cu e pueblo Colombiano a celebra diadomingo ultimo pa aproba of desaproba e acuerdo di paz entre nan gobierno y guerrilla di Farc, un ambiente di incertidumbre a wordo crea paden y pafo di Colombia.
E decision aki a laga den limbo e proceso di paz aki. Ademas a polarisa mas e pais Colombia entre esunnan cu a vota na fabor di NO lidera pa ex presidente Alvaro Uribe; y esunnan cu a vota na fabor di SI lidera pa presidente actual, Juan Manuel Santos.
Pero tambe a habri e porta di un dialogo cu a cuminsa ayera y cu tabata necesario entre e diferente grupo politiconan di ambos banda. Ambos banda a lanta nan respectivo comision cu lo ta encarga di analisa e caminda cu nan mester cana. E grupo di Uribe ta boga pa e negociacion cu Farc lo wordo habri bek pa haci coreccionnan cu nan ta considera necesario riba e acuerdo di paz cu gobierno di Colombia y Farc a yega di firma prome cu e plebiscito lo tuma luga fin di siman ultimo.
Di otro banda, presidente Santos a bisa cu e conflicto arma entre ehercito di Colombia y Farc cu a stop na luna di augustus ultimo, lo keda vigente te dia 31 di october awor. E stop di e conflicto aki a wordo considera definitivo, pero despues di e crisis inespera cu e resultado di e plebiscito a produci, eventualmente e guera aki lo sigui manera a yega di sosode durante mas cu 50 aña.
E acuerdo cu a wordo negocia durante casi 4 aña na La Habana a wordo rechasa cu un 50.21% di e votonan, compara cu un 49.78% di esunnan cu a vota na fabor di implementacion di e acuerdo di paz. E diferencia entre esun cu a vota SI y esun cu a vota NO ta tabata chikito; pero su impacto tabata grandi pa pone den peliger e posibilidad cu Colombia lo por a pone fin na e conflicto arma aki cu a laga cantidad di morto.
