Pa hopi a resulta un sorpresa, pa otronan no, cu un gran parti di e hobennan cu ta haya nan den problema cu husticia ta procedente di un famia cu un solo mayor. Esey no mester ta un sorpresa pasobra e situacion na cualkier otro pais ta duna e mesun imagen. Y constatando esey mester ta obvio tambe cu pone un tipo di ‘culpa’ cerca e famianan aki tampoco ta yuda na haya solucion, si acaso e tipo di ptroblema aki ta algo cu por haya solucion, mucho menos di e categoria ‘facil’.

Constata cu gran mayoria di delincuente hubenil tin cierto background familiar no ta bisa tanto, tambe pasobra e opcionnan pa ataca e problemanan cu delincuencia hubenil ta duna no ta tanto diferente den caso di delincuente hubenil cu ta procedente di un famia di dos mayor. Por lo tanto no tin ningun motibo pa ‘stigmatiza’ e mayor soltero como un contribuyente na e problema di delincuencia. Keto bay un di cada tres delincuente hubenil ta bin di un famia cu dos mayor, unda ta surgi e ora e pregunta ta kico a bay robez den e casonan ey. For di estudionan na otro pais ta resulta cu background familiar no ta un factor determinante y ta solamente un di e factornan pa tuma na cuenta. Den tur caso, tanto di esun cu a lanta cu un mayor como e demasnan cu dos, ta importante haya un vista riba e otro factornan cu ta hunga un papel. Esey por ehemplo ta e situacion den cual un mucha ta lanta, unda e mayor soltero tin o no tin apoyo di famia o amigo, cu ta representa un forza educador extra den alrededor di e hoben. Esey por yuda cu di tur manera tin vigilancia den e oranan cu e mayor no ta disponible, pa motibo di trabao entre otro.

Ta conoci di analisis na otro pais cu e oranan despues di scol, unda no tin un mayor presente pa vigila loke nan yiu ta haci, ta en general e oranan mas peligroso pa e hoben. Esey ta conta sigur tambe den e situacion cerca nos, unda hopi biaha ambos mayor ta ocupa cu trabao. Den e sentido ey no ta haci diferencia si nos mester crea un ambiente mas sigur pa nos mucha y hobennan, por ehemplo den forma di atencion den e oranan despues di scol, unda no tin mayor disponible. Tur por beneficia por igual.

E solucion cu gran cantidad di pais a adopta ta esun di crea facilidad di atencion despues di scol, pa cubri e oranan cu e mayor(nan) no ta disponible. Exito den e proyectonan aki ta varia, sin embargo nos no por bay den mas detaye den e editorial aki. Un bon tema pa nos ‘follow up’ sigur. Importante ta pa señala cu aki tambe algun decada atras a cuminza dedica atencion na e tema aki. Loke si por observa ta cu e proyecto di atencion despues di scol a haya un tinte politico, y cu e consecuencia cu nunca e proyecto a logra pasa na inclui integralmente educacion secundario. Y esey mientras tabata, y ta ainda, cu problema di delincuencia ta hungando un papel menazante na algun scol secundario. Esaki ta absolutamente inaceptable y lo ta bon cu sikiera un biaha nos politiconan por ta di acuerdo cu otro cu nos no ta logra nada si e urgencia ta keda poni un banda cu e sugerencia cu aki ta trata di un ‘capricho partidario’. Ta bon pa mira cu den e caso aki un di e politiconan di e partido grandi na mando ta trece e tema aki dilanti. Sin embargo, no ta suficiente pa djis aplaudi su aporte na e debate publico, sino mester trece dilanti loke realmente ya necesario den gobernacion pa crea e condicionnan necesario pa desaroya e plan cu realmente por haci un diferencia. Papia superficialmente di crea mas consciencia y mustra mayornan den termino general riba nan responsabilidad no ta yuda, sigur no cerca e mayor, soltero of no, cu ta purba tene cabez riba awa cu dos trabao.

Y ta aki nos ta topa atrobe cu e responsabilidad di e nivel politico, di gobierno y parlamento. Tanten nos ta sigui biba den un sistema gubernamental cu ta keda desperdicia centenares di miyones na un aparato publico no productivo, y miyones na interes pa cubri nan fiestanan financiero di pasado, no lo tin recurso pa realmente crea un sistema adecua di atencion na mucha y hoben. Y cu esey nos ta keda pega cu e expresionnan gratuito cada tanto tempo, ora cu politiconan ta haya nan gana di recorda nos di e problema, como sifuera nos mes ta ignorante di e asunto ey.

Hunto cu e reformanan necesario den enseñanza basico y avanza, mester diseña di biaha tambe e maneho di e cuido despues di scol. Hunto esaki lo mester bira e proyecto pa cual lo mester mas inversion cu cualkier otro. Esaki ta exigi un cambio di mentalidad completo, pasobra te awor ta trata enseñanza y cuido social como ‘sluitpost’ di presupuesto, unda fuera di gasto di salario practicamente no tin espacio pa inversion. Y sin e armanan necesario pa combati e situacion señala, tur cos ta keda mescos, y ta keda hinca placa den represion hudicial, mientras nos por sigui ‘disfruta’ di e lamentonan barata di esnan yama pa tuma decision.

LJMADURO – 27-MEI-2022