Columnista popular Ariën Rasmijn ta cla pa otro reto

Den Cayente lo por fria den algun luna, pero nada ta stroba otro pa cuminza cu su mesun candela

Su pen ta skerpi, su mente lihe y no tur biaha e por sconde su talento pa observa bida rond di dje cu un poco sarcasmo. Y Ariën Rasmijn a haya un vehiculo ideal pa haci uso di su talento pa observacion personal cu su trabao profesional como periodista y esey tabata su columna ‘Den Cayente.’ Un columna cu tabata rekeri un disciplina pa ta consistente pero sigur a yuda e periodista refina su habilidad di skirbi.

Sinembargo, futuro di e columna por yega na su limite. Rasmijn ta preparando pa muda di Aruba, pa un aventura nobo na Europa. Kico exactamente e futuro lo ta no ta completamente cla, pero e potencialnan ta grandi. Y motibo di e oportunidadnan nobo ta netamente su experiencia como periodista na Aruba.

Ariën Rasmijn a biba hopi tempo na Hulanda, unda el a studia Comunicacion. El a bolbe Aruba na 2009, unda el a haya trabao na Amigoe di Aruba. Tabata su hefe e tempo ey, Sharina Henriquez kende a dun’e e base periodistico y a gui’e den e prome lunanan. Pero for di momento cu Ariën Rasmijn a haci su entrada den e mundo periodistico na Aruba, e tabata hopi cla cu e cabayero aki a bin pa pone su marca.

Introduccion den periodismo na Aruba tabata interesante pa Rasmijn. AZV a haya dos Director despues cu Booshi Wever a haya problema cu Jos Mud, KLM a stop di bula pa Aruba, sindicatonan publico a protesta pa ahuste di costo di bida y refineria Valero a cera su portanan. Y riba dje, partidonan tabata prepara pa eleccion na September. Trabao tabatin.

“Mi no tabata bon adapta pa Aruba. Mi ta corda cu Prome Minister Nel Oduber tabatin su oficina na e edificio di ATA y nunca mi tabatin un sentido di vestuario cu na Aruba a considera bon. M’a biba asina hopi tempo na Hulanda y m’a cana kibra na oficina di Prome Minister bisti na short.” E mester a bandona e edificio.

Pero, Rasmijn no a laga e exigencia di vestuario strob’e pa haci su trabao. A lo largo, tur hende a custumbra cu e tin su mesun pensamento kico ta e protocol di bisti como periodista y poco tabata e biahanan cu por a mira Ariën Rasmijn den flus cu dashi. “Ami no ta cambia pa ningun hende. Mi por adapta. Pero tin diferencia entre scucha kico otro ta pensa y laga otro hende controla mi. Semper mi a percura pa mi a keda afo di cualkier circulo.” E actitud aki a proteha Rasmijn di haya un stempel, sigur uno politico, manera a bira un custumber na Aruba. Realidad ta cu na e isla aki, hopi biaha hende ta purba balota otro, sigur si un hende ta periodista. Pa asina purba decifra di con un hende ta critico. “A hasta bisa di mi cu mi tabata un drogadicto,” Rasmijn a bisa na harimento. E mes ta kere cu e hecho cu e no tin un laso asina fuerte di famia na Aruba, ni cu un bario of trabao, tabata dificil pa a hink’e den un skina specifico. Su trabao na Amigoe ademas a permitie libertadnan profesional mirando cu e doñonan di e corant no tabata na Aruba. Y locual Rasmijn mas a aprecia ta e posibilidad pa por cubri tur tema, cu a permitie desaroya su mes y bay den profundidad riba temanan. Pasobra esey a haci’e mas facil pa hende a papia cune. Nunca e tabatin problema, cu excepcion di algun caso, pa haya su entrevistanan. El a logra traha su red di contacto y a haya un reputacion di ta un periodista, un persona confiabel y nunca tabata neng’e entrevista. “Ni na 2009 Mike Eman a nenga di duna mi entrevista.” Rasmijn a conta con e aña ey el a mira e lider di AVP para dilanti edificio di Top FM y a dicidi pa bay papia cune. Eman tabata campañando pa candidato pa Parlamento Europeo Mito Croes. Para pafo, Eman a haci e comentario ‘mar’e CDA por paga pa henter e cos aki,’ y e frase ey a aparece den Amigoe. El a lanta hopi stof na Hulanda, cu a duna Geert Wilders oportunidad pa ataca CDA for di Tweede Kamer. Eman no tabata contento cu Rasmijn y a lag’e sa tambe.

Su carera den periodismo tabata interesante pero no sin momentonan dificil. Rasmijn a experiencia ‘burn-outs,’ a laga Amigoe, cuminza cu Den Cayente, y a traha cu diferente medio, incluso Caribisch Netwerk. Pero el bolbe Amigoe, cu un team nobo, tur cu un conviccion profesional similar y kizas mas importante “un sentido di humor basta scur, pero cu tabata yuda nos tur.”

Trabao periodistico na Aruba ta keda uno bunita, pero cu hopi reto. Tin diferente interes den wega y e lasonan, particularmente cu partidonan politico ta fuerte. Tabatin momento dificil, manera e protestanan, welga di hamber y e pandemia.

Pero asina mes, periodismo critico y imparcial ta posibel. “E prome dia cu mi a cuminza traha den periodismo na Aruba, mi a sinta cu mi tata (red. ex Alto Comisario di Polis Lucas Rasmijn) kende a urgi pa semper mi sigui mi consenshi y honor. Y esey a keda e principio principal den periodismo pa mi.” E otro ta pa skirbi riba politica for di punto di bista di un nivel humano.

Su speranza awor ta cu otro lo tuma e pen of e computer, y pone locual ta mira den palabra pa asina laga esnan na poder keda sinti e cayente, na interes comun di Aruba. “Na final, e ta contamento di un storia.”