(DW) – Ayera diadomingo miles di Colombiano a sali marcha den e cayanan di Bogota, Medellin, Cali, Barranquilla y otro ciudadnan di e pais pa manifesta nan oposicion contra gobierno di presidente Gustavo Petro, specialmente contra maneho di sector di salud y su intencion di convoca un constituyente pa reforma Constitucion.

E mobilisacion, denomina “Marcha di bata blanco,” convoca pa Asociacion Colombiano di Cirugia unda despues Asociacion Colombiano de Sociedadnan Identifica (ACSC) tambe a uni ta representa 69 organisacion di mediconan specialista, asina como tambe miles di persona di varios sector.

“Mi a vota pa e cambio, pa Petro, pero nos ta sigui cu e mesun situacion. Mi ta marcha pasobra mi ta sigui pensa cu Colombia tin algun speransa y mi ta stima mi pais,” Martha Estrada, un pensionado di 64 aña a bisa.

Na capital Colombiano, e comienso di e manifestacion a haya menasa di yobidanan cu a cuminsa cay trempan mainta na Parke Nacional, luga unda e manifestantenan ta concentra pa bay na Plaza Bolivar. “No mas aumento di combustibel,” tabata bisa e borchinan di algun transportista, cu tambe ta reclama na gobierno mas seguridad den careteranan na unda tin gruponan di atracado.

Segun Alcaldia di Bogota, cerca di 45.000 persona a yega na Plaza Bolivar.

Un di e ciudadnan unda a cuminsa prome cu e manifestacion tabata Barranquilla, esun principal di Caribe Colombiano, caminda un multitud bisti di blanco of cu e T-shirt geel di seleccion di futbol a reuni dilanti stacion di Transmetro Joe Arroyo. Na Medellin, e di dos ciudad di Colombia y na unda Petro ta enfrenta e mayor oposicion, e multitud, cu banderanan di Colombia mas otronan berde y blanco di departamento di Antioquia, a cuminsa reuni na avenida Oriental cu La Playa.

Politiconan di partidonan di derecha ta sigui cu exigencianan pa gestion di administracion di Pero, manera e caso di e ex-senador Nancy Patricia Gutierrez, ken a menciona cu “Diadomingo 21 di april ta un fecha inolvidabel pa Colombia.”

Na Miami, Merca, tambe a marcha contra Pero caminda centenares di ciudadano a mobilisa te consulado Colombiano na e ciudad aki pa e protesta.

Aunke oposicion Colombiano a manifesta varios biaha contra gobierno di Petro, e manifestacion di ayera ta parce cu tabata esun di mas grandi pa motibo cu ta parti for di e rechaso di intervencion di gobierno pa sistema di salud.

Petro a yega na poder na augustus 2022 como e prome iskierdista cu ta goberna un pais tradicionalmente dirigi pa elitenan conservador. Cu un 60% di desaprobacion, segun encuesta di Invamer, e mandatario a bin perdiendo apoyo di forsanan politico na Congreso y tambe den e plasa publico unda e ta hopi activo.