(AP) — Gobierno nobo di Colombia y miembronan di e ultimo grupo guerrillero di e nacion a tuma stapnan ayera pa reanuda negociacionnan di paz, cu a keda suspendi tres aña pasa na Cuba.
Despues di un reunion entre representantenan di ambos banda na Havana, e comisionado di paz nacional di Colombia, Danilo Rueda a bisa cu gobierno ta bay tuma e ‘stapnan hudicial y politico necesario’ pa haci negociacionnan di paz posible cu e Ehercito di Liberacion Nacional, ELN.
Observadornan ta considera poco probable cu e stapnan en cuestion ta bay inclui elimina orden di aresto pa negociadornan di ELN cu ta bibando den exilio actualmente na Cuba.
E administracion di e recien inaugura presidente Gustavo Petro ta bay negocia cu e delegacion di ELN y ta considera nan como representantenan legitimo di e grupo rebelde, Rueda a bisa.
Negociacionnan di paz entre e gobierno Colombiano anterior y ELN a stop na 2019 despues cu e rebeldenan a rementa un auto bom na un academia di polis na Bogota, matando mas di 20 cadet.
Despues di e incidente, autoridadnan Colombiano a emiti orden di aresto pa lidernan di ELN na Cuba pa e negociacionnan di paz. Pero Cuba a nenga di extradita nan, argumentando cu haci esaki lo compromete su status como un nacion neutral den e conflicto y viola protocolnan diplimatico.
Merca a responde poniendo Cuba riba su lista di estadonan patrocinador di terorismo.
Petro a bisa cu e kier cuminsa negociacionnan di paz cu e ultimo gruponan arma di e nacion den un esfuerso pa reduci violencia den areanan rural y trece paz duradero na e nacion di 50 miyon persona.
