(infobae) – E siman aki, Nicaragua y Colombia ta bay presenta di forma oral nan argumentonan pa e caso “Cuestion di delimitacion di plataforma continental entre Nicaragua y Colombia mas leu di e 200 miya nautico desde costa Nicaraguense (Nicaragua c, Colombia).”
Carolina Olarte, co-agente di Colombia dilanti e Corte Internacional di Husticia (CIH) a splica cu “esaki tin di haci cu un presunto plataforma continental extendi cu Nicaragua ta alegando cu ta extende hopi mas leu cu e 200 miya nautico di costa Nicaraguense. Den e caso particular aki, Nicaragua ta solicitando e Corte pa haci e delimitacion corespondiente na e presunto plataforma continental extendi aki, respecto di cual, por supuesto, Colombia tin un postura completamente diferente.”
Olarte a indica cu Colombia su argumento principal durante e audiencianan oral ta cu e CIH no tin nada pa delimita. El a enfatisa cu Colombia ta yega bon prepara legalmente pa e audiencianan, indicando cu “Colombia no ta yega pa improvisa.”
“Colombia ta bay presenta su defensa absolutamente fortaleci pa un team multidisciplinario tanto den agente, co-agente y asesor.”
Mester recorda cu e caso a inicia dia 16 di september 2013, tempo cu Nicaragua a pone su demanda dilanti di e tribunal internacional. Colombia a considera importante pa presenta excepcionnan preliminar, un mecanismo usa cu proposito di haci obhecion contra e competencia di CIH pa cu e pretensionnan di Nicaragua, un documento cu a entrega dia 14 di augustus 2014.
Despues di añanan di accion legal, e Corte a dicidi di duna cita, entre dia 5 pa 9 di december 2022, pa e audiencianan oral tocante e parti huridico di fondo di e caso. Ta spera cu den esakinan ta bay trata “e puntonan cu ainda ta separa e partinan sin mester bolbe expone tur loke ya a trata por escrito, ni simplemente ripiti e hecho y argumentonan cu ya a invoca den esakinan.” E siman aki, e Corte no ta bay duna ningun veredicto den e caso.
