(EFE) – Na Colombia y Mexico defende medio ambiente a bira casi un sentencia di morto: e dos pais aki ta registra e number mas halto di asesinato pa defensornan ambiental na mundo, cu 65 y 30 homicidio na 2020, segun un estudio publica ayera dialuna pa Global Witness.
E organisacion ta señala ademas cu 2020 ta e aña cu mas morto, 227 asesinato di lidernan ambiental na tur e planeta, loke ta nifica, den promedio, cuatro lider morto pa siman, cu ya a supera e record di 212 morto violento di 2019.
E pandemia, en bes di reduci e crimen, a haci di e defensornan un blanco mas facil ora nan tabata cera den nan cas. Organisacion ta bati alarma ademas pa un aumento den tipo di menasa, cu mas detencion, campaña di difamacion y criminalisacion cu ta acusa nan di terorista.
Latino America ta sigui como e region mas peligroso na mundo pa defensornan di medio ambiente: 3 di cada 4 atake registra na 2020 a sucede den e region y 7 di e 10 mas afecta ta na Latino America.
E incidencia halto ta sucede den parti pa motibo cu e casonan por documenta cu mas facilidad, ya cu “den otro continentenan acceso pa informacion ta mas limita…no ta cu tin menos caso sino cu hopi di nan no ta yega na oido publico” Laura Furones, activista di derechonan humano di Global Witness a afirma.
E fortalesa di sociedad civil y di movemento indigena cu ta sigui bibo na Latino America, segun Furones, ta permiti “un defensa fuerte di recursonan”, pero tambe ta causa “enfrentamento y asesinato pa e oposicion pacifico aki”.
Despues di Colombia y Mexico, na di tres luga mundialmente ta ocupa Filipinas (29), despues ta sigui den su mayoria paisnan Latino Americano: Brasil cu 20 asesinato, Honduras (17), Republica Democratico di Congo (15), Guatemala (13), Nicaragua (12), Peru (6), India (4), Indonesia (3), South Africa (2) y Tailandia (2).
