(Reuters) – Forsa Militar di Colombia y Ecuador diaranson ultimo a firma un acta di compromiso pa implementa un plan pa contene e accionnan di narcotrafico y crimen organisa na frontera entre e dos pais, segun autoridadnan di ambos pais a informa.
Colombia y Ecuador ta comparti un frontera terestre di 586 kilometer, un scenario habitual di actividadnan ilegal di contrabanda y trafico di droga di parti di gruponan guerrillero y criminal.
E Plan di Proteccion di Frontera ta bay crea posibilidadnan di actuacion na nivel tactico, operativo y strategico mediante operacion militar coordina, entre comandantenan di unidad operativo asina como tambe den e decisionnan politico strategico cu mester wordo aproba pa ministerionan di defensa di ambos pais, segun un comunicado di Comando Conhunto di Forsa Arma di Ecuador a señala.
Gobierno di presidente di Colombia Gustavo Petro a pidi na final di november na e paisnan cu ta comparti frontera como Brazil, Ecuador, Panama, Peru y Venezuela, nan colaboracion pa lansa un ofensiva militar contra gruponan arma ilegal cu tin vinculo cu narcotrafico na fronteranan unda a haya cultivonan grandi y extenso di blachi di coca, materia prima di cocaina, tambe a haya laboratorionan pa produci droga y e presencia di gruponan arma ilegal cu ta dedica na narcotrafico cu tin relacion cu cartelnan Mexicano, segun fuentenan di seguridad a afirma.
